बारावीचं वर्ष आहे म्हणून आकीब नबीच्या वडिलांनी ग्लेन मॅकग्राच्या कॅम्पला दिला होता नकार

आकीब नबीचा श्रीलंकेच्या दौऱ्यासाठी भारतीय संघात समावेश करण्यात आला आहे.

आकीब नबी (फोटो-लोकसत्ता)

जम्मू काश्मीरचा आकीब नबी भारतासाठी पदार्पण करण्याच्या उंबरठ्यावर आहे. दोन वर्ष सातत्यपूर्ण प्रदर्शन करणाऱ्या नबीला श्रीलंकेविरुद्धच्या मालिकेसाठी निवडण्यात आलेल्या संघात प्रवेश मिळाला नव्हता. पण जसप्रीत बुमराहला झालेल्या दुखापतीमुळे नबीचा मार्ग मोकळा झाला. भारतासाठी खेळणारा नबी जम्मू काश्मीरचा पहिला खेळाडू ठरू शकतो. यंदाच्या रणजी हंगामात नबीने ६० विकेट्स पटकावल्या होत्या. नबीच्या दिमाखदार प्रदर्शनाच्या जोरावर जम्मू काश्मीरने पहिल्यांदा रणजी करंडक स्पर्धेच्या जेतेपदावर कब्जा केला होता. नुकत्याच झालेल्या भारताच्या अ संघाच्या श्रीलंका दौऱ्यातही त्याने चांगली कामगिरी केली होती.

जम्मू काश्मीरमध्ये क्रिकेटसाठी आवश्यक पायाभूत सुविधा अत्यंत मर्यादित प्रमाणात आहेत. त्यामुळे अनेकांना चांगल्या संधीसाठी, प्रशिक्षणासाठी अन्यत्र जावं लागतं. अशीच एक संधी नबीकडे चालून आली होती. नबी बारावीत शिकत असताना बीसीसीआयतर्फे एक कॅम्प भरवण्यात आला होता. या कॅम्पमध्ये ऑस्ट्रेलियाचा वेगवान गोलंदाज ग्लेन मॅकग्रा मार्गदर्शन करणार होता. अचूक टप्प्यावर गोलंदाजी करण्यात मॅकग्रा वाकबगार मानला जात असे. जगातल्या अव्वल गोलंदाजांमध्ये गणना होणाऱ्या मॅकग्राकडून शिकण्याची संधी कॅम्पमध्ये सहभागींना मिळणार होती. पण नबीच्या बाबांनी आकीबला जाण्यास मनाई केली. बारावीचं वर्ष आहे, अभ्यास महत्त्वाचा आहे सांगत त्यांनी आकीबला जाऊ दिलं नाही. मात्र एका स्नेह्यांनी त्यांचं मन वळवलं.

‘बीसीसीआयतर्फे आयोजित या कॅम्पला आकीबला पाठवायचंच नाही असं त्यांनी पक्कं केलं होतं. तिथे मॅकग्रा असणार होता. त्याने बारावीवर पूर्ण लक्ष केंद्रित करावं आणि वैद्यकीय शिक्षणासाठीच्या प्रवेश परीक्षेसाठी तयारी करायला घ्यावी असं त्यांचं मत होतं. पण मॅकग्राच्या मार्गदर्शनात कॅम्प ही मोठी संधी आहे. आकीबला खूप काही शिकायला मिळेल असं मी त्यांनी सांगितलं. अशी संधी दुर्मीळतेने मिळते, त्याचा फायदा उठवायला हवा असं मी सांगितलं’, असं आकीबचा पहिला क्लब कर्णधार झुबैर दारने सांगितलं.

‘मी खूप पाठपुरावा केला, अखेर ते आकीबला कॅम्पसाठी पाठवायला तयार झाले. मात्र या कॅम्पसाठी आकीबला काश्मीरहून चेन्नईला ट्रेनने पाठवायला त्यांनी नकार दिला. त्यांनी आकीबला विमानाने पाठवण्याचा निर्णय घेतला. त्यासाठी त्यांनी १०,००० रुपये जमवले. एका सरकारी शाळेतील शिक्षकासाठी ही खूप मोठी रक्कम होती. पण त्यांनी त्यांनी जमवलं. काही महिन्यांपूर्वी आकीबला आयपीएल स्पर्धेतील दिल्ली कॅपिटल्स संघाने ताफ्यात घेतलं. त्यावेळी आकीबच्या वडिलांना हा प्रसंग आठवला’, असं झुबैरने सांगितलं.

१६वर्षाच्या आकीबला मॅकग्राच्या मार्गदर्शनात खेळता आलं, सराव करता आला. शिकायला मिळालं. नबीला फुटबॉलपटू व्हायचं होतं पण वेगाच्या आकर्षणातून त्याने क्रिकेटची निवड केली. नबीने गोलंदाजीच्या बरोबरीने त्याच्या फलंदाजीवर काम केलं आहे.

‘भारत अ संघ, आयपीएल आणि डोमेस्टिक क्रिकेटमध्ये खेळल्यानंतरही आकीब बदललेला नाही. तो अतिशय कमी बोलतो. आयपीएलसाठी रवाना होण्यापूर्वी तो माझ्या घरी आला होता. एक प्रसंग मला आठवतो. १४ वर्षांचा असताना तो आमच्या क्लबविरुद्ध एक सामना खेळला होता. त्याने चांगली गोलंदाजी केली आणि ५० धावांची खेळीही केली. आमच्या क्लबसाठी खेळणार का असं मी त्याला विचारलं. त्यावेळी तो म्हणाला होता- क्लबकडून खेळण्यासाठी मला पैसे भरावे लागतील का’? त्याच्या निरागस प्रश्नाने मी भारावून गेलो.

‘काश्मीरमध्ये त्यावेळी एकच टर्फ विकेट होती. श्रीनगरच्या शेर ए काश्मीर स्टेडियममध्ये ती व्यवस्था होती. जिल्हा स्तरावरचा एक सामना होता. जसं आम्ही स्टेडियममध्ये पोहोचलो आकीब मला म्हणाला, मित्रा मी रात्रभर झोपू शकलेलो नाही. या मैदानावर खेळण्याच्या विचाराने मला झोप लागली नाही. त्याने टाकलेला पहिला चेंडू मला आजही लक्षात आहे. त्याने स्नीकर्स घातले होते. बॉलिंग स्पाईक्स घालणं आवश्यक होतं. त्याला हे ठाऊक नव्हतं. संघातल्या एका अनुभवी खेळाडूने त्याचं षटक पूर्ण केलं’, अशी आठवण झुबैरने सांगितली.