सुपर ओव्हपर्यंत लांबलेल्या दुसऱ्या ट्वेन्टी-२० क्रिकेट लढतीत ऑस्ट्रेलियाने श्रीलंकेवर सरशी साधून पाच सामन्यांच्या मालिकेत २-० अशी आघाडी घेतली. निर्धारीत सामन्यात २२ धावांत तीन बळी मिळवण्यासह सुपर ओव्हरमध्ये अवघ्या पाच धावा देणारा जोश हेझलवूड ऑस्ट्रेलियाच्या विजयाचा शिल्पकार ठरला. प्रथम फलंदाजी करताना जोश इंग्लिशच्या (४८) फटकेबाजीमुळे ऑस्ट्रेलिया ६ बाद १६४ धावा केल्या. प्रत्युत्तरात पथुम निसंकाच्या (७३) अर्धशतकामुळे श्रीलंकेने २० षटकांत ८ बाद १६४ धावांपर्यंत मजल मारली. मात्र निर्णायक सुपर ओव्हरमध्ये निसंका-दसुन शनका यांना अवघ्या पाच धावाच करता आल्या. मग ग्लेन मॅक्सवेल-मार्कस स्टोयनिसने तीन चेंडूतच विजयी लक्ष्य गाठले. उभय संघांतील तिसरा सामना मंगळवारी खेळवण्यात येईल.
