दुबई : टीकाकारांची तोंडे बंद करण्यापेक्षा स्वत:ला सिद्ध करण्याच्या जिद्दीमुळेच सूर गवसला व ट्वेन्टी-२० विश्वचषकातील सर्वोत्तम खेळाडू ठरण्यात मला यश आले, अशी प्रतिक्रिया ऑस्ट्रेलियाचा सलामीवीर डेव्हिड वॉर्नरने व्यक्त केली. ‘आयपीएल’मधील सुमार कामगिरीमुळे वॉर्नरची सनरायजर्स हैदराबाद संघाच्या कर्णधारपदावरून हकालपट्टी करण्याबरोबरच अखेरच्या काही सामन्यांसाठी त्याला वगळण्यात आले. विश्वचषकापूर्वी झालेल्या सराव लढतींमध्येही वॉर्नर एकेरी धावांतच बाद झाला. परंतु विश्वचषकात तीन अर्धशतकांसह त्याने २८९ धावा केल्या. ‘‘आयपीएलमधील अपयशामुळे मला स्वत:लाच माझ्या क्षमतेविषयी विविध प्रश्नांनी भेडसावले. परंतु मी खचलो नाही. विश्वचषकात फक्त मूलभूत घटकांवर भर दिला. त्यामुळे स्वत:ला सिद्ध केल्याचा अभिमान आहे,’’ असे वॉर्नर म्हणाला.
