सलग दुसऱ्या लढतीत चार गोल करून लुईस सुआरेझने ला लिगा फुटबॉल स्पध्रेत बार्सिलोनाला पुन्हा एकदा मोठा विजय मिळवून दिला. सुआरेझच्या दमदार कामगिरीमुळे बार्सिलोनाने स्पोर्टिग गिजॉनचा ६-० असा धुव्वा उडवून जेतेपदावरील पकड कायम राखली आहे. दुसरीकडे अ‍ॅटलेटिको माद्रिदने १-० अशा फरकाने मलगावर विजय मिळवत बार्सिलोनावर दडपण राखले, तर ०-२ अशा पिछाडीवरून रिअल माद्रिदने गॅरेथ बेलच्या दोन गोलच्या जोरावर रायो व्हॅलेकानोचा ३-२ असा पराभव केला. ला लिगा स्पध्रेत सलग तीन पराभवांचा सामना करणाऱ्या बार्सिलोनाला सुआरेझने नवसंजीवनी दिली. गेल्या आठवडय़ात त्याने चार गोल करून बार्सिलोनाला डेपोर्टिव्हो ला कारूनावर ८-० असा विजय मिळवून दिला होता. त्यात रविवारीही त्याने हा धडाका कायम राखला. बार्सिलोना आणि अ‍ॅटलेटिको माद्रिदच्या खात्यात ८२ गुण जमा झाले असून रिअल माद्रिद ८१ गुणांसह तिसऱ्या स्थानावर आहे.
