Batsman With Most Sixes In Test Cricket: भारत आणि श्रीलंका या दोन्ही संघांमधील २ कसोटी सामन्यांच्या मालिकेतील पहिला कसोटी सामना गॉलच्या मैदानावर सुरु आहे. या सामन्यात भारतीय संघातील यष्टीरक्षक फलंदाज ऋषभ पंतने एक खास रेकॉर्ड आपल्या नावावर केला आहे. ऋषभ पंत हा कसोटी क्रिकेटमध्ये सर्वात जलद १०० षटकार मारणारा आणि १०० षटकारांचा पल्ला गाठणारा पहिलाच भारतीय फलंदाज ठरला आहे. दरम्यान कोण आहेत कसोटी क्रिकेटमध्ये सर्वाधिक षटकार खेचणारे टॉप ५ फलंदाज? जाणून घ्या.
कसोटी क्रिकेटमध्ये सर्वाधिक षटकार मारणाऱ्या फलंदाजांच्या यादीत बेन स्टोक्स अव्वल स्थानी आहे. स्टोक्सने १२२ कसोटी सामन्यातील २२२ डावांत फलंदाजी करताना १३८ षटकार खेचले आहेत. स्टोक्सने काही दिवसांपूर्वीच आंतरराष्ट्रीय क्रिकेटमधून निवृत्तीची घोषणा केली आहे. या रेकॉर्डमध्ये ब्रँडन मॅक्यूलम दुसऱ्या स्थानी आहे. मॅक्यूलमच्या नावे १०१ कसोटी सामन्यातील १७६ डावांमध्ये फलंदाजी करताना १०७ षटकार मारण्याची नोंद आहे. आता ऋषभ पंतकडे मॅक्यूलमला मागे टाकून या यादीत दुसऱ्या स्थानी पोहोचण्याची संधी असणार आहे.
श्रीलंकेविरुद्धच्या कसोटीतील दुसऱ्या डावात २ षटकार खेचताच ऋषभ पंतने कसोटी क्रिकेटमध्ये १०० षटकारांचा पल्ला गाठला आहे. पंतने ५१ कसोटी सामन्यातील ८९ डावात १०० षटकारांचा पल्ला गाठला आहे. यासह तो १०० षटकार खेचणारा पहिलाच भारतीय फलंदाज ठरला आहे.
कसोटी क्रिकेटमध्ये सर्वाधिक धावा करणाऱ्या फलंदाजांच्या यादीत ऑस्ट्रेलियाचा माजी यष्टीरक्षक फलंदाज अॅडम गिलख्रिस्ट चौथ्या स्थानी आहे. त्याच्या नावे ९६ सामन्यातील १३७ डावांमध्ये १०० षटकार मारण्याची नोंद आहे. तर न्यूझीलंडचा माजी वेगवान गोलंदाज टीम साऊदीच्या नावे देखील १०७ कसोटी सामन्यातील १५६ डावात फलंदाजी करताना ९८ षटकार खेचण्याची नोंद आहे.
ऋषभ पंतची दमदार खेळी
श्रीलंकेविरुद्ध सुरु असलेल्या पहिल्या कसोटी सामन्यातील पहिल्या डावात ऋषभ पंत हवी तशी कामगिरी करु शकला नव्हता. त्याने पहिल्या डावात ६२ चेंडूंमध्ये ३९ धावांची खेळी केली होती. तर दुसऱ्या डावात फलंदाजी करताना त्याने श्रीलंकेच्या गोलंदाजांची चांगलीच धुलाई केली. या डावात त्याने ६९ चेंडूंमध्ये ६६ धावांची खेळी केली. या खेळीदरम्यान त्याने २ षटकार खेचले.
