विंडीजविरुद्ध कसोटी मालिकेसाठी BCCI क्युरेटर पाठवणार, सौराष्ट्र क्रिकेट असोसिएशन नाराज

“बीसीसीआय ज्या पद्धतीने वागत आहे, त्यामुळे चुकीचा पायंडा पडण्याची शक्यता आहे. सौराष्ट्र क्रिकेट असोसिएशनकडे खेळपट्टी बनवणारे प्रगत क्युरेटर काम करतात. सौराष्ट्र क्रिकेट असोसिएशन बीसीसीआयशी अनेक वर्षांपासून संलग्न आहे. गेली अनेक वर्ष आम्ही आमच्या मैदानावर सामने भरवले आहेत. अशावेळी बीसीसीआय स्वतःचे क्युरेटर खेळपट्टीच्या देखभालीसाठी पाठवतंय, हे चुकीचं आहे. सामन्यानंतर आयसीसीने खेळपट्टीबद्दल आक्षेप घेतले, तर त्याची जबाबदारी बीसीसीआयची असेल. सौराष्ट्र क्रिकेट असोसिएशन याला जबाबदार राहणार नाही.” सौराष्ट्र क्रिकेट असोसिएशने सदस्य निरंजन शहा यांनी इंडियन एक्स्प्रेसशी बोलताना आपलं मत मांडलं.

आतापर्यंत ज्या मैदानावर सामना भरवला जातो, त्या संघटनेचे क्युरेटर हे खेळपट्टी बनवतात. मात्र गेल्या काही वर्षांमध्ये बीसीसीआयने खेळपट्टीच्या देखभालीसाठी स्वतःचे क्युरेटर पाठवायला सुरुवात केली आहे. “जर बीसीसीआयला खेळपट्ट्यांची इतकीच चिंता असेल तर प्रत्येक मैदानासाठी त्यांनीच क्युरेटरची नेमणूक करावी, मग स्थानिक लोकांची गरजच भासणार नाही. बाहेरून येणाऱ्या व्यक्तींपेक्षा स्थानिक क्युरेटरना मैदानाची जास्त माहिती असते. तुमच्या गरजेनुसार तुम्हाला खेळपट्टी बनवता येते.” त्यामुळे बीसीसीआयला हा निर्णय आपल्याला पटलेला नसल्याचंही शहा यांनी स्पष्ट केलं.