भारताच्या खराब विदेश दौऱ्यांनंतर BCCI ॲक्शन मोडमध्ये; गंभीर-आगरकर-लक्ष्मण यांना बैठकीसाठी बोलावलं, ‘हे’ आहेत चर्चेचे ५ विषय

या बैठकीत आयर्लंड आणि इंग्लंड दौऱ्यांवरील भारतीय संघाच्या पराभवाचाही आढावा घेतला जाणार आहे. त्या पराभवानंतर भारताच्या विदेशातील कामगिरीचा आढावा घेतला जाईल, असं मंडळाचे सचिव देवजित सैकिया यांनी यापूर्वी सांगितलं होतं; मात्र काही कारणांमुळे ही बैठक लांबणीवर पडली.

आयर्लंड आणि इंग्लंड दौऱ्यांतील पराभवाचा बीसीसीआयकडून सखोल आढावा

भारतीय संघाच्या अलीकडच्या विदेश दौऱ्यांचा निकाल पाहता परिस्थिती फारशी समाधानकारक नाही. जूनमध्ये आयर्लंडविरुद्धची दोन सामन्यांची टी-२० मालिका भारताने २-० ने गमावली. त्यामुळे टी-२० विश्वचषक विजेत्या भारतीय संघाची जवळपास तीन वर्षांपासून सुरू असलेली सलग १६ मालिका विजयांचा सिलसिला थांबला. त्यानंतर इंग्लंड दौऱ्यावरही भारताची कामगिरी निराशाजनक राहिली. भारताने पाच सामन्यांची टी-२० मालिका ४-० ने गमावली. नॉटिंगहॅममध्ये झालेला १२५ धावांचा पराभव हा या दौऱ्यातील सर्वात मोठ्या धक्क्यांपैकी एक ठरला.

वनडे मालिकेत यानंतर भारताने काही प्रमाणात पुनरागमन केलं. बर्मिंगहॅममधील पहिला वनडे सामना जिंकत भारताने मालिकेची चांगली सुरुवात केली, मात्र अखेर ही मालिका भारताला २-१ ने गमवावी लागली. त्यामुळे आता BCCIच्या बैठकीत संघाची विदेशातील कामगिरी, निवड प्रक्रिया आणि आगामी काळातील नियोजनावर काय चर्चा होते, याकडे सर्वांचं लक्ष लागलं आहे.

भारत या वर्षाच्या अखेरीस न्यूझीलंड दौऱ्यावर जाणार आहे. २०२७च्या वनडे विश्वचषकाचा विचार करता BCCIला संघाशी संबंधित सर्व घटकांमध्ये एकमत आणि समन्वय साधायचा आहे. या बैठकीत खेळाडूंच्या दुखापती आणि त्यांच्या व्यवस्थापनाचा मुद्दा विशेष महत्त्वाचा ठरणार आहे. महत्त्वाच्या दौऱ्यांपूर्वी अनेक खेळाडू दुखापतग्रस्त झाल्याने BCCI आणि सेंटर ऑफ एक्सलन्सवर (CoE) अलीकडे टीका झाली आहे. अनेक खेळाडूंचा CoEवरील विश्वास कमी झाल्याचंही समजतं. तसेच खेळाडू, CoE आणि निवड समिती यांच्यातील संवादातही काही अंतर असल्याचं समोर आलं आहे.

एका प्रकरणात तर वेगवान गोलंदाज जसप्रीत बुमराह दौऱ्यासाठी फिट नसल्याची माहिती निवड समितीला देण्यातच आली नव्हती, असं समोर आलं होतं. याशिवाय वॉशिंग्टन सुंदर दुखापतीमुळे संघाबाहेर झाला, तर साई सुदर्शनला फिट होण्यासाठी अपेक्षेपेक्षा अधिक वेळ लागला. आयपीएलमधील खेळाडूंच्या कामाच्या ताणाचा त्यांच्या फिटनेसवर होणारा परिणाम हाही बैठकीतील चर्चेचा महत्त्वाचा मुद्दा असेल. पूर्णपणे फिट नसलेल्या खेळाडूंच्या अनुपलब्धतेबाबत टीम मॅनेजमेंटने यापूर्वीच BCCIकडे चिंता व्यक्त केली आहे.

अफगाणिस्तानविरुद्धच्या टी-२० मालिकेसाठी भारतीय संघाची घोषणा करतानाही चार खेळाडूंचा सहभाग त्यांच्या फिटनेसवर अवलंबून राहत करण्यात आला आहे. जसप्रीत बुमराह, वॉशिंग्टन सुंदर, नितीश रेड्डी आणि हर्षित राणा यांची ९ सप्टेंबर रोजी फिटनेस चाचणी होणार आहे. न्यूझीलंड दौऱ्याचा विचार करता भारतीय वेगवान गोलंदाजांचा गट पूर्णपणे फिट कसा ठेवता येईल आणि भविष्यात दुखापतींचं प्रमाण कसं कमी करता येईल, यावरही BCCI चर्चा करणार आहे.

याशिवाय हार्दिक पंड्याचा फिटनेस आणि दुखापतीतून पुनरागमन हा देखील बैठकीतील महत्त्वाचा विषय असेल. २०२७च्या विश्वचषकासाठी हार्दिक उपलब्ध असावा, अशी निवड समितीची इच्छा आहे. मात्र, सध्या तो वनडे सामन्यात पाच ते सहा षटकांपेक्षा अधिक गोलंदाजी करू शकत नाही. त्यामुळे त्याचा फिटनेस, गोलंदाजीचा वर्कलोड आणि आगामी मोठ्या स्पर्धांसाठी त्याची उपलब्धता याबाबतही चर्चा होण्याची शक्यता आहे.