तारांकितांनी संधी दवडल्याने बेल्जियमचे बरोबरीवर समाधान; इजिप्तविरुद्ध आक्रमकांकडून निराशा

अनुभवी आघाडीपटू लुकाकू पायाच्या दुखापतीतून सावरत असल्याने प्रशिक्षकांनी त्याला आधी राखीव फळीत ठेवण्याचा निर्णय घेतला. त्याला उत्तरार्धात ६६व्या मिनिटाला मैदानावर उतरवण्यात आले आणि अवघ्या २३ सेकंदांत त्याने प्रभाव पाडला. त्याच्या समावेशानंतर बेल्जियमच्या आक्रमणाची गती वाढली. या दडपणाखाली इजिप्तच्या मोहम्मद हानीकडून स्वयंगोल झाला आणि सामना १-१ असा बरोबरीत आला.

लुकाकू मैदानावर येण्यापूर्वी बेल्जियमचा संघ केवळ डी ब्रुएनेवर अवलंबून असल्याचे दिसले. त्याला सातव्या आणि ५३व्या मिनिटाला गोल करण्याची संधी होती. मात्र, दोन्ही वेळा त्याला चेंडू गोलजाळीवर मारता आला नाही. त्याचा फटका डाव्या बाजूने बाहेर गेला. त्यानंतर लुकाकूलाही विजयी गोल करता आला असता. परंतु त्याने मारलेल्या हेडरवर चेंडू गोलच्या वरून गेला. त्यामुळे बेल्जियमला केवळ एका गुणावर समाधान मानावे लागले.