India vs West Indies 5th T20 Arshdeep Singh Injury Replacement: भारत आणि वेस्ट इंडिज यांच्यातील पाचव्या आणि निर्णायक सामन्यासाठी भारतीय संघात मोठा बदल करण्यात आला आहे. चौथ्या टी-२० सामन्यातील अखेरच्या षटकात अर्शदीप सिंगला फलंदाजी करताना दुखापत झाली होती. या दुखापतीमुळे तो संघाबाहेर झाला असून त्याच्या जागी बदली खेळाडूची घोषणा करण्यात आली. स्विंगचा किंग अशी ओळख असलेला भुवनेश्वर कुमारची त्याच्या जागी बदली खेळाडू म्हणून निवड करण्यात आली आहे. बीसीसीआयने संघातील या बदलाची घोषणा केली आहे.

वेस्ट इंडिजविरुद्धच्या मालिकेतील निर्णायक पाचव्या टी-२० सामन्यापूर्वी भारतीय संघाने अनुभवी वेगवान गोलंदाज भुवनेश्वर कुमारला संघात स्थान दिलं आहे. शनिवारी होणाऱ्या या सामन्यासाठी भुवनेश्वरचा संघात समावेश करण्यात आला असून, दुखापत झालेल्या अर्शदीप सिंगच्या जागी त्याला संधी मिळाली आहे. वयाच्या ३६व्या वर्षी भुवनेश्वर भारतीय संघात पुनरागमन करत आहे. नोव्हेंबर २०२२मध्ये न्यूझीलंडविरुद्ध खेळलेल्या सामन्यानंतर तब्बल चार वर्षांनी त्याला पुन्हा संघात स्थान मिळालं आहे.

बीसीसीआयचे सचिव देवजित सैकिया यांनी निवेदनात म्हटलं, “बुधवारी हैदराबादमध्ये वेस्ट इंडिजविरुद्ध झालेल्या चौथ्या टी-२० सामन्यादरम्यान अर्शदीप सिंगच्या गोलंदाजी करणाऱ्या खांद्याला दुखापत झाली. त्यामुळे भुवनेश्वर कुमारचा संघात समावेश करण्यात आला आहे. अंतिम टी-२० सामन्यात अर्शदीप खेळणार की नाही, याचा निर्णय त्याच्या दुखापतीतून सावरण्याच्या प्रगतीचा आढावा घेऊन सामन्यापूर्वी घेतला जाईल.”

भुवनेश्वर कुमारचं भारतीय संघात पुनरागमन पुढील आठवड्यात होणार होतं. भारताचा न्यूझीलंड दौरा २२ ऑक्टोबरपासून सुरू होणार असून, त्यामध्ये पाच टी-२० आंतरराष्ट्रीय सामन्यांची मालिका खेळवली जाणार आहे. मात्र, वेस्ट इंडिजविरुद्धच्या निर्णायक पाचव्या टी-२० सामन्यापूर्वीच भुवनेश्वरला संघात स्थान मिळालं आहे.

आयपीएलच्या मागील दोन हंगामांमध्ये भुवनेश्वरने आपल्या गोलंदाजीने छाप पाडली. यादरम्यान त्याने ४५ विकेट्स घेतल्या असून, विकेट्स घेणाऱ्या गोलंदाजांमध्ये तो आघाडीवर राहिला. टी-२० क्रिकेटमध्ये सर्वाधिक विकेट्स घेणारा भारतीय वेगवान गोलंदाज म्हणूनही त्याची ओळख आहे.

वेस्ट इंडिजविरुद्ध पाचव्या टी-२० सामन्यासाठी भारताचा सुधारित संघ

श्रेयस अय्यर (कर्णधार), अभिषेक शर्मा, वैभव सूर्यवंशी, ईशान किशन (यष्टीरक्षक), संजू सॅमसन (यष्टीरक्षक), तिलक वर्मा (उपकर्णधार), शिवम दुबे, कुलदीप यादव, अक्षर पटेल, रवी बिश्नोई, नितीश कुमार रेड्डी, अर्शदीप सिंग, प्रिन्स यादव, मयंक यादव, नमन धीर आणि भुवनेश्वर कुमार.