Cheteshwar Pujara’s century against Somerset : डब्ल्यूटीसी फायनल २०२३ नंतर टीम इंडियातून वगळले होते. त्यानंतर चेतेश्वर पुजाराने इंग्लंडमध्ये शानदार शतक झळकावत फॉर्ममध्ये परतल्याचे संकेत दिले आहेत. खरंतर, पुजाराने इंग्लंडमध्ये सुरू असलेल्या देशांतर्गत वनडे चषक स्पर्धेत ससेक्सकडून खेळताना शानदार शतक झळकावले आहे. त्याच्या शतकामुळे ससेक्सने सॉमरसेटचा ४ विकेट्सने पराभव केला. सलग तीन सामने गमावल्यानंतर ससेक्सचा हा पहिला विजय ठरला. ब गटात ससेक्स तळाशी आहे.
पुजाराने आपल्या खेळीत लगावले ११ चौकार –
कूपर असोसिएट्स कौंटी मैदानावर खेळल्या गेलेल्या या सामन्यात सॉमरसेट संघाने प्रथम फलंदाजी करताना ५० षटकांत ६ गडी गमावून ३१८ धावा केल्या. सॉमरसेटकडून स्कॉटलंडच्या अँड्र्यू होप (११९) आणि कर्टिस कॅम्फर (१०१) यांनी शतके झळकावली. प्रत्युत्तरात ससेक्स संघाने ४८.१ षटकांत ३१९ धावांचे लक्ष्य पार केले. ससेक्ससाठी पुजाराने ११३ चेंडूत ११७ धावा करून नाबाद राहिला आणि संघाला विजयाकडे नेले. पुजाराने आपल्या खेळीत ११ चौकार मारले.
पुजाराचे लिस्ट ए मध्ये झळकावले १६ वे शतक –
या खेळीद्वारे चेतेश्वर पुजाराने टीम इंडियात पुनरागमनाचे संकेत दिले आहेत. आपल्या शतकी खेळीमुळे चेतेश्वर पुजाराने लिस्ट ए मध्ये ५५०० धावा पूर्ण केल्या आहेत. हे त्याचे लिस्ट ए कारकिर्दीतील १६ वे शतक होते. पुजाराने आतापर्यंत १२१ लिस्ट ए सामन्यांमध्ये ५८.४८ च्या प्रभावी सरासरीने ५५५६ धावा केल्या आहेत. पुजाराने या फॉरमॅटमध्ये ३३ अर्धशतकेही झळकावली आहेत. याशिवाय पुजाराची लिस्ट ए मध्ये दुसऱ्या क्रमांकाची सर्वोच्च सरासरी आहे.
हेही वाचा – विराट कोहलीने चाहत्याला दिला पुढच्या वेळी सेल्फी देण्याचा शब्द, VIDEO होतोय व्हायरल
इंडिजविरुद्धच्या कसोटी मालिकेतून पुजाराला वगळले –
चेतेश्वर पुजारा सध्या भारतीय संघातून बाहेर आहे. जागतिक कसोटी चॅम्पियनशिपच्या अंतिम सामन्यानंतर त्याला संघातून वगळण्यात आले आहे. डब्ल्यूटीसी फायनलमध्ये पुजारा फ्लॉप ठरला होता. या सामन्यात त्याने केवळ २१ धावा केल्या. एवढेच नाही तर मागील १० कसोटी सामन्यांमध्ये पुजाराच्या बॅटमधून केवळ एक अर्धशतक झळकले. या फ्लॉप कामगिरीनंतर पुजाराला वेस्ट इंडिजविरुद्धच्या दोन कसोटी सामन्यांच्या मालिकेतून वगळण्यात आले. त्याच्या जागी यशस्वी जैस्वालची संघात निवड करण्यात आली.
