मुनोझचा निर्णायक गोल; डीआर काँगोवरील विजयासह कोलंबिया बाद फेरीत

काँगो संघाचा गोलरक्षक लिओनेल पासी-नझाऊ याचा तगडा बचाव आणि उत्तरार्धात नाकारण्यात आलेले दोन गोल यामुळेच डॅनिएल मुनोझने ७६व्या मिनिटाला केलेल्या गोलचे महत्त्व वाढते. स्पर्धेच्या इतिहासात २३ सामन्यांत कोलंबियाने ९ विजय मिळवले असून, ११ सामन्यांत पराभव झाला आहे. मात्र, त्यांचा सामना कधीही गोलशून्य बरोबरीत सुटलेला नाही.

पासीचे शानदार गोलरक्षण

सामन्याच्या सुरुवातीपासूनच काँगोचा गोलरक्षक पासी-नझाऊने लक्ष वेधून घेतले. कोलंबियाचे पहिल्या २० मिनिटांतील गोल करण्याचे प्रयत्न पासीने लिलया थोपून धरले. जेम्स रॉड्रिगेझ, योहान मोहिका, लुईस डियाझ आणि डॅनियल मुनोझ यांनी गोलपोस्टच्या दिशेने एकापाठोपाठ एक फटके मारले. मात्र, पासीने ते सहज रोखून कोलंबिया खेळाडूंना निराश केले. अगदी सामन्याच्या ५०व्या मिनिटाला डियाझची जोरदार किकही त्याने अडवून कोलंबियाच्या निराशेत भर घातली. मात्र, ७६व्या मिनिटाला अखेर कोलंबियाला पासीला चकवण्यात यश आले. गोलकक्षात वेगवान मुसंडी मारल्यानंतर मुनोझने मारलेली किक पासीला रोखता आली नाही.

डियाझचे गोल रद्द

कोलंबियाचा प्रमुख आक्रमक लुईस डियाझने अवघ्या दोन मिनिटांच्या अंतराने चेंडू गोलपोस्टमध्ये ढकलून चाहत्यांना जल्लोष करण्याची संधी दिली होती. परंतु, पंचांनी पहिल्या गोलच्या वेळी फाउल (७९व्या मिनिटाला) आणि दुसर्‍या गोलच्या वेळी ऑफसाईड (८०व्या मि.) घोषित केल्यामुळे कोलंबियाचे दोन्ही गोल रद्द झाले.