नवी दिल्ली : भारतीय कुस्ती महासंघाचे अध्यक्ष ब्रिजभूषण शरण सिंह यांच्या विरोधात आंदोलन करणाऱ्या कुस्तीगिरांना मिळालेल्या वागणूकीचा निषेध करत जागतिक कुस्ती संघटनेने मंगळवारी भारतीय कुस्ती महासंघ निलंबित करण्याचा इशाराही दिला.ब्रिजभूषण यांच्याविरोधात उभे राहिलेल्या भारतीय कुस्तीगिरांचे आंदोलन रोखताना कुस्तिगीरांना दिलेल्या वागणूकीचा निषेध करणारे ‘ट्वीट’ जागतिक कुस्ती महासंघाने केले. भारतीय कुस्ती क्षेत्रात सध्या जे काही सुरु आहे त्याकडे जागतिक संघटना कायम नजर ठेवून होती. आंदोलक कुस्तीगिरांची ज्या पद्धतीने धरपकड करण्यात आली ती कृती निषेधार्हच आहे. आमच्या जागतिक संघटनेच्या प्रशासकीय यंत्रणेने याची दखल घेतली आहे.
भारतीय कुस्ती महासंघाला नव्या निवडणूकीची कार्यपद्धती तातडीने राबविण्याची सूचना केली आहे. याबाबतची माहिती त्वरित न दिल्यास भारतीय कुस्ती महासंघ निलंबित करण्याचा इशाराही जागतिक संघटनेने दिला आहे. विशेष म्हणजे कुस्तीगिरांच्या सुरुवातीच्या निषेधानंतर क्रीडा मंत्रालयाने महासंघाची निवडणूक प्रक्रिया स्थगित करून ती नव्याने राबविण्यासाठी स्वतंत्र समिती स्थापन केली होती. या समितीला यासाठी ४५ दिवसांची मुदत देण्यात आली आहे.
मराठीतील सर्व क्रीडा बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.
Web Title: Condemnation by the world organization of the treatment received by the wrestlers amy