IPL 2026: काय हे दुर्देव, दिमाखात पदार्पण आणि काही तासात जखमी होऊन स्पर्धेबाहेर; चेन्नईमागची दुखापतींची मालिका थांबेना

रामकृष्णच्या उजव्या पायाला फ्रॅक्चर झाल्याचं चेन्नई सुपर किंग्सच्या वैद्यकीय चमूने स्पष्ट केलं. शनिवारी चेन्नई संघाने रामकृष्णने पदार्पण केलं. सामन्याच्या आठव्या चेंडूवर विल जॅक्सने मारलेला फटका अचूक टिपत रामकृष्णने आयपीएल प्रवासाची दिमाखात सुरुवात केली. गोलंदाजीची संधी मिळाल्यानंतर रामकृष्णने भारतीय टी२० संघाचा कर्णधार सूर्यकुमार यादवला बाद केलं. रामकृष्णच्या उसळत्या चेंडूवर सूर्यकुमारने हवेत उडी घेत मोठा फटका मारायचा प्रयत्न क्षेत्ररक्षकाच्या हातात जाऊन विसावला.

२०२५ मेगा ऑक्शनमध्ये चेन्नईने रामकृष्णला ३० लाख रुपये मोजून ताफ्यात घेतलं. पण त्याला गेल्या वर्षी एकाही सामन्यात संधी मिळाली नाही. चेन्नईने त्याला रिटेन केलं. शनिवारी त्याला पदार्पणाची संधी मिळाली मात्र दुर्देवाने याच लढतीत तो तो दुखापतग्रस्त झाला.

चेन्नई संघाला लागलेलं दुखापतींचं ग्रहण पाठ सोडत नाहीये. पायाला झालेल्या दुखापतीमुळे माजी कर्णधार महेंद्रसिंग धोनी अद्याप एकही सामना खेळू शकलेला नाही. वेगवान गोलंदाज नॅथन एलिस हंगाम सुरू होण्याआधीच दुखापतग्रस्त झाला. भन्नाट फॉर्मात असलेला आयुष म्हात्रेलाही दुखापत झाली. डावखुरा वेगवान गोलंदाज खलील अहमदच्या मांडीच्या स्नायूंना दुखापत झाल्यामुळे तोही स्पर्धेबाहेर गेला आहे.

रामकृष्ण घोष हा मध्यमवर्गीय कुटुंबातील मुलगा आहे, ज्याला महाराष्ट्राच्या वरिष्ठ संघात स्थान मिळवण्यासाठी प्रचंड मेहनत करावी लागली. पण त्याने कधीच हार मानली नाही. महाराष्ट्र क्रिकेट असोसिएशनकडून आयोजित करण्यात येणाऱ्या महाराष्ट्र प्रीमियर लीग स्पर्धेत तो चमकला. या स्पर्धेत त्याला ऋतुराज गायकवाडच्या नेतृत्वाखाली खेळण्याची संधी मिळाली. ऋतुराज गायकवाड हा पुणेरी बाप्पा संघाचा कर्णधार आहे. आता तो पुन्हा एकदा ऋतुराज गायकवाडच्या नेृतृत्वाखाली खेळत आहे. तो सर्वात चर्चेत तेव्हा आला, जेव्हा त्याने विजय हजारे ट्रॉफीत हिमाचल प्रदेश संघाविरूद्ध खेळताना एकाच डावात ४२ डावात ७ गडी बाद केले होते.