England Playing 11 For IND vs ENG 2nd T20I: भारत आणि इंग्लंड यांच्यातील दुसऱ्या टी-२० सामन्याकरता इंग्लिश संघाने प्लेईंग इलेव्हन जाहीर केली आहे. पहिला सामना पावसामुळे रद्द झाल्यानंतर आता दुसऱ्या सामन्यावर सर्वांच्या नजरा आहेत. मालिकेतील दुसरा सामना शनिवारी, ४ जुलैला मँचेस्टर येथे खेळवला जाणार आहे. दोन्ही संघ या सामन्यासाठी सज्ज झाले आहेत. दरम्यान, इंग्लंडने सामना सुरू होण्यापूर्वीरे २४ तास आधीच प्लेईंग इलेव्हन जाहीर करताना संघात दोन बदल करण्यात आले आहेत.

भारत आणि इंग्लंड क्रिकेट संघांमधील टी-२० मालिकेतील पहिला सामना पावसामुळे रद्द करावा लागला. भारतीय संघाने फलंदाजी करत चांगली धावसंख्या उभारली होती, परंतु इंग्लंडचा डाव सुरू होणार इतक्यातच पावसाचा जोर वाढल्याने सामना पूर्ण होऊ शकला नाही. आता दुसरा सामना शनिवारी सायंकाळी ७ वाजता होणार आहे.

इंग्लंडच्या प्लेईंग इलेव्हनमध्ये संघामध्ये बदल करण्यात आले आहेत. जोफ्रा आर्चरचं संघात पुनरागमन झालं आहे, तर जोश टंगला आपला पहिला सामना खेळण्याची संधी मिळेल. जोश टंग याने यापूर्वी आंतरराष्ट्रीय क्रिकेट खेळला असला, तरी आता तो टी-२० आंतरराष्ट्रीय सामन्यात पदार्पण करण्यास सज्ज झाला आहे. पहिल्या सामन्याला मुकल्यानंतर जोफ्रा आर्चरचं संघात पुनरागमन होत आहे. परिणामी, साकिब महमूद आणि ल्यूक वुड यांना प्लेईंग इलेव्हनमधून वगळण्यात आलं आहे.

हेही वाचा

सामन्यादिवशी नाणेफेक झाल्यानंतरच भारताची प्लेईंग इलेव्हन कशी असेल हे कळेल. या सामन्यात वैभव सूर्यवंशीला आंतरराष्ट्रीय क्रिकेटमध्ये पदार्पण करण्याची संधी मिळण्याची शक्यता आहे. मागील सामन्यात संजू सॅमसन सात चेंडूंमध्ये केवळ एक धाव काढून बाद झाला होता. त्याआधी, आयर्लंडविरुद्धच्या मालिकेतही त्याला दोन्ही सामन्यांत विशेष प्रभाव पाडता आला नाही आणि दोन्ही वेळा तो स्वस्तात बाद झाला.

हेही वाचा

भारतीय संघाचा नवा टी-२० कर्णधार श्रेयस अय्यर आपल्या पहिल्या विजयाच्या प्रतीक्षेत आहे. आयर्लंडविरुद्धच्या मालिकेत त्याच्या नेतृत्वाखाली सलग दोन सामने गमावल्यानंतर संघ इंग्लंडविरूद्ध खेळण्यासाठी उतरला आहे. पहिला सामना अनिर्णित राहिल्याने कर्णधार श्रेयस अय्यरच्या नजरा पहिल्या विजयाकडे असतील. मालिकेच्या दृष्टीने आता दोन्ही संघांसाठी आगामी सामना अत्यंत महत्त्वाचा असणार आहे.

हेही वाचा

इंग्लंडची भारताविरूद्ध दुसऱ्या टी-२० सामन्यासाठी प्लेइंग इलेव्हन

फिल सॉल्ट, जोस बटलर, हॅरी ब्रुक (कर्णधार), जेकब बेथेल, टॉम बँटन, सॅम करन, विल जॅक्स, लियाम डॉसन, जोफ्रा आर्चर, आदिल रशीद, जोश टंग.