Euro Cup 2020 : फायनल गाठण्यासाठी इटली आणि स्पेनमध्ये रंगणार ‘दंगल’!

वाचा कुठे आणि केव्हा पाहता येणार हा सामना

euro cup 2020 spain vs italy match preview
यूरो कप – इटली वि. स्पेन

जवळपास महिनाभर चाहत्यांचे मनोरंजन करणारी यूरो कप २०२० स्पर्धा आता उपांत्य फेरीपर्यंत येऊन थांबली आहे. आज मध्यरात्री साडेबारा वाजता स्पेन आणि इटली हे दोन मातब्बर संघ एकमेकांसमोर उभे ठाकणार आहेत. या दोन्ही संघात आज पहिला उपांत्य सामना खेळला जाणार आहे. दोन्ही संघांचे फॅन-फॉलोइंग जबरदस्त असल्याने कोणता संघ अंतिम फेरीत धडक देणार यांची उत्कंठा शिगेला पोहोचली आहे. लंडनच्या वेम्बली स्टेडियमवर ही लढत रंगणार आहे.

यंदाच्या यूरो कप स्पर्धेत इटली हा असा संघ आहे, ज्याने सर्व सामने जिंकले आहेत. मात्र आज त्यांचा पराभव झाला, तर त्यांच्या सर्व मेहनतीवर पाणी पडू शकते. यूरो कपच्या बाद फेरीतील दोन्ही संघांमधील हा चौथा सामना असेल. यापूर्वी झालेल्या तीन सामन्यांत स्पेनने दोन वेळा विजय मिळवला आहे. २०१६च्या यूरो कपमधील अंतिम-१६ फेरीत इटलीने स्पेनला २-० ने हरवून स्पर्धेबाहेर केले होते. तर, २००८च्या उपांत्यपूर्व फेरीच्या पेनल्टी शूट आउटमध्ये स्पेनने प्रथमच इटलीला पराभूत केले. २०१२च्या यूरो कपच्या अंतिम सामन्यात स्पेनने इटलीला ४-०ने पराभूत करून विजेतेपद पटकावले होते.

 

हेही वाचा – COPA AMERICA 2021 : मेस्सी कोलंबियाविरुद्ध ठोकणार दीडशतक!

दोन्ही संघांमधील महत्त्वाचे मुद्दे

  • इटली आणि स्पेन एकमेकांशी ३७ वेळा भिडले असून दोन्ही संघांनी प्रत्येकी ११ सामने जिंकले आहेत, तर १५ सामने बरोबरीत राखले आहेत.
  • स्पेनला इटलीविरुद्धच्या गेल्या सात लढतींपैकी फक्त एकच सामना गमवावा लागला आहे. २०१६च्या यूरो कपमध्ये इटलीच्या विजयात जॉर्जियो चिएलिनी आणि ग्राझियानो पेल्ले यांनी योगदान दिले होते.
  • यूरो कपमध्ये इटली आणि स्पेन सलग चौथ्यांदा आमने-सामने येणार असून यापैकी २००८मध्ये स्पेनने पेनल्टी-शूटआऊटमध्ये ४-२ असा आणि त्यानंतर २०१२च्या अंतिम फेरीत ४-० असा विजय मिळवला होता.

 

कुठे पाहता येणार सामना?

टीव्हीवर हा सामना सोनी टेन २ एसडी आणि एचडी, सोनी टेन ३ एसडी आणि एचडी (हिंदी) पाहता येईल. मोबाईलवर हा सामना सोली लीव, जिओ टीव्ही या अॅपवर पाहता येईल.

कुठे रंगणार सामना?

लंडनच्या वेम्बली स्टेडियमवर हा सामना रंगणार आहे.

सामन्याची वेळ

भारतीय वेळेनुसार मंगळवारी रात्री (७ जुलै) साडेबारा वाजता.

Loksatta Telegram लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व क्रीडा बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Euro cup 2020 italy vs spain match preview adn