लंडन : आघाडीपटू सादिओ मानेने केलेल्या दोन गोलच्या बळावर लिव्हरपूलने मँचेस्टर सिटीला ३-२ असे नमवत ‘एफए चषक’ फुटबॉल स्पर्धेच्या अंतिम फेरीत धडक मारली. लंडनच्या वेम्बली स्टेडियमवर झालेल्या उपांत्य फेरीच्या सामन्यातील पूर्वार्धात लिव्हरपूलने अप्रतिम खेळ केला. नवव्या मिनिटाला बचावपटू इब्राहिमा कोनाटेने हेडरद्वारे केलेल्या गोलमुळे लिव्हरपूलचे खाते उघडले. मग मानेने (१७ , ४५वे मिनिट) दोन गोलची भर घातल्याने मध्यांतराला लिव्हरपूलकडे ३-० अशी आघाडी होती. उत्तरार्धात मात्र सिटीने अधिक आक्रमक शैलीत खेळ केला. सिटीकडून जॅक ग्रिलिशने ४७व्या मिनिटाला, तर बर्नाडरे सिल्वाने ९० मिनिटांनंतरच्या भरपाई वेळेत गोलही केले. पण अखेरच्या मिनिटांत लिव्हरपूलचा गोलरक्षक अॅलिसनने चांगला खेळ केल्याने सिटीला २-३ असा पराभव पत्करावा लागला.
