नेदरलँड्स आणि सेनेगल या संघांनी मंगळवारी आपापले अखेरचे साखळी सामने जिंकत ‘फिफा’ विश्वचषक फुटबॉल स्पर्धेच्या उपउपांत्यपूर्व फेरीत प्रवेश केला. नेदरलँड्सने तीन सामन्यांत सात गुणांसह अ-गटात अग्रस्थान पटकावत बाद फेरीचा टप्पा गाठला. आफ्रिकन चषक विजेत्या सेनेगलने तीन सामन्यांत सहा गुण मिळवत स्पर्धेत आगेकूच केली. या गटातून यजमान कतार आणि इक्वेडोर या संघांचे आव्हान संपुष्टात आले. यजमान कतारचा पराभव अल खोर : चार वर्षांनंतर विश्वचषक फुटबॉल स्पर्धेच्या मुख्य फेरीसाठी पात्र ठरल्यानंतर नेदरलँड्सने बाद फेरी गाठत पुनरागमन साजरे केले. अ-गटातील मंगळवारी झालेल्या अखेरच्या सामन्यात नेदरलँड्सने यजमान कतारचा २-० असा पराभव केला. नेदरलँड्सची बाद फेरीत पोहोचण्याची ही अकरावी वेळ ठरली. प्रमुख खेळाडूंसह खेळणाऱ्या नेदरलँड्सने चेंडूवरील नियंत्रण, अचूक पासच्या जोरावर कतारवर पूर्ण वर्चस्व राखले. सामन्याच्या २६व्या मिनिटाला कोडी गाकपोने नेदरलँड्सचे गोलचे खाते उघडले. त्याचा स्पर्धेतील हा तिसरा गोल ठरला. त्यानंतर उत्तरार्धात फ्रँकी डी योंगने ४९व्या मिनिटाला नेदरलँड्सचा दुसरा गोल केला. हीच आघाडी अखेपर्यंत कायम राखताना नेदरलँड्सने विजयावर शिक्कामोर्तब केले. उत्तरार्धात वेगवान खेळणाऱ्या नेदरलँड्सचा धडाका जबरदस्त ठरला. पण, त्यांना आघाडी आणखी भक्कम करण्यात अपयश आले. सामन्याच्या ६९व्या मिनिटाला गाकपोचा गोल ‘व्हीएआर’च्या मदतीनंतर अपात्र ठरविण्यात आला. चेंडू गाकपोच्या हाताला लागून गोलजाळीत गेल्याचे स्पष्ट झाले. त्यापूर्वी, उत्तरार्धाच्या प्रारंभीच ४९व्या मिनिटाला डी योंगने चेंडूला शिताफीने गोलजाळीची दिशा दिली.
