पॅरिस : सर्बियाच्या तिसऱ्या मानांकित नोव्हाक जोकोव्हिचने फ्रेंच खुल्या टेनिस स्पर्धेतील पुरुष एकेरी गटाच्या उपांत्य फेरीत प्रवेश केला. तर, महिला एकेरी गटात अरिना सबालेन्का आणि चेक प्रजासत्ताकच्या कॅरोलिना मुचोव्हा यांनी आपापल्या उपांत्यपूर्व सामन्यात विजय नोंदवत उपांत्य फेरीत धडक मारली.
जेतेपदाच्या प्रबळ दावेदारांपैकी एक असलेल्या जोकोव्हिचने कारेन खाचानोव्हवर ४-६, ७-६ (७-०), ६-२, ६-४ असा विजय नोंदवला. पहिल्या सेटमध्ये खाचानोव्हने जोकोव्हिचला चांगली टक्कर दिली. त्याने सेट ६-४ असा जिंकत आघाडी घेतली. यानंतर मात्र, जोकोव्हिचने आपला खेळ उंचावताना खाचानोव्हला पुनरागमनाची संधीच दिली नाही आणि सलग तीन सेट जिंकत उपांत्य फेरीतील आपली जागा निश्चित केली. पुरुष एकेरीत डेन्मार्कच्या होल्गर रूनने अर्जेटिनाच्या फ्रॅन्सिस्को सेरुनडोलोला ७-६ (७-३), ३-६, ६-४, १-६, ७-६ (१०-७) असे चुरशीच्या लढतीत नमवले.
मराठीतील सर्व क्रीडा बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.
