पारितोषिक रकमेवरून टेनिसपटूंमध्ये नाराजी; फ्रेंच स्पर्धेच्या एकूण महसुलातील खेळाडूंचा वाटा घटल्याची टीका

‘‘खेळाडूंचे उत्तम प्रतिनिधित्व, आरोग्य सुविधा आणि निवृत्तीवेतन अशा खेळाडूंच्या अन्य मागण्यांकडे अधिकार्‍यांनी लक्ष दिलेले नाही,’’ असेही खेळाडूंच्या या गटाने स्पष्ट केले आहे. विशेष म्हणजे फ्रेंच आयोजकांनी गेल्याच महिन्यात सपर्धेच्या पारितोषिक रकमेत सुमारे दहा टक्के वाढ करण्यात आली असून एकूण रक्कम ६ कोटी १७ लाख युरो (अंदाजे ६८७ कोटी रुपये) झाल्याचे जाहीर केले होते. गेल्या वर्षीच्या तुलनेत ५३ लाख युरोने ही रक्कम अधिक असल्याचेही आयोजकांनी सांगितले होते. त्यानंतर खेळाडूंची ही प्रतिक्रिया आली आहे.

स्पर्धेच्या एकूण महसुलातील खेळाडूंचा वाटा २०२४ मधील १५.५ टक्क्यांवरून २०२६ मध्ये १४.९ टक्क्यांपर्यंत खाली आला आहे. पुरुष आणि महिला एकेरीच्या विजेत्यांना प्रत्येकी २८ लाख युरो, तर उपविजेत्यांना १४ लाख युरो मिळतील. उपांत्य फेरीतील खेळाडूंना ७ लाख ५० हजार युरो आणि पहिल्या फेरीत पराभूत होणार्‍यांना ८७ हजार युरो मिळणार आहेत. पुरुष आणि महिला दुहेरीतील विजेत्यांना ६ लाख युरो आणि मिश्र दुहेरीच्या विजेत्यांना १ लाख २२ हजार युरो मिळतील. खेळाडूंनी मात्र पारितोषिक रकमेबाबत नाराजी व्यक्त केली आहे.

स्पर्धेतून मिळणार्‍या एकूण महसुलाच्या तुलनेत खेळाडूंना मिळणारा वाटा कमी होत चालला आहे. स्पर्धेच्या अधिकार्‍यांच्या म्हणण्यानुसार, २०२५ मध्ये स्पर्धेतून ३९.५० कोटी युरो महसूल मिळवला, जो वार्षिक १४ टक्के वाढ दर्शवतो. तरीही बक्षीस रकमेत केवळ ५.४ टक्के वाढ झाली, ज्यामुळे महसुलातील खेळाडूंचा वाटा १४.३ टक्क्यांपर्यंत कमी झाल्याचे खेळाडूंच्या गटाने प्रसिद्धीस दिलेल्या निवेदनात म्हटले आहे. या वर्षीच्या स्पर्धेचा अंदाजित महसूल ४० कोटी युरोपेक्षा जास्त असताना, बक्षीस रक्कम महसुलाच्या १५ टक्क्यांपेक्षा कमी राहण्याची शक्यता आहे. ही रक्कम खेळाडूंनी मागितलेल्या २२ टक्के हिश्श्यापेक्षा खूपच कमी आहे. ही रक्कम ‘एटीपी’ आणि ‘डब्लूटीए’च्या एकत्रित एक हजार मानांकन स्पर्धांच्या बरोबरीने आणणे आवश्यक आहे, असे खेळाडूंचे म्हणणे आहे.