रूड, नॉरी, रुबलेव्हची आगेकूच; महिलांत सबालेन्का, रायबाकिनाचे विजय पॅरिस : अग्रमानांकित स्पेनचा कार्लोस अल्कराझ व तिसरा मानांकित सर्बियाचा नोव्हाक जोकोव्हिच यांनी फ्रेंच खुल्या ग्रँडस्लॅम टेनिस स्पर्धेतील पुरुष एकेरीच्या तिसऱ्या फेरीत धडक मारली. ब्रिटनचा कॅमेरुन नॉरी, आंद्रे रुब्लेव्ह व नॉर्वेचा कॅस्पर रूड यांनीही आगेकूच केली. महिला गटात अरिना सबालेन्का, दारिया कसात्किना व कझाकस्तानच्या एलिना रायबाकिना यांनी पुढच्या फेरीत प्रवेश केला. जोकोव्हिचने दुसऱ्या फेरीतील सामन्यात हंगेरीच्या माटरेन फुक्सोव्हिक्सला ७-६ (७-२), ६-०, ६-३ असे नमवत तिसरी फेरी गाठली. पुढच्या फेरीत त्याच्यासमोर अलेहांद्रो डेव्हिडोव्हिच फोकिनाचे आव्हान असेल.अल्कराझने जपानच्या टारो डॅनिएलवर ६-१, ३-६, ६-१, ६-२ असा विजय साकारला. पुढच्या फेरीत अल्कराझसमोर कॅनडाच्या डेनिस शापाव्हालोव्हचे आव्हान असेल. पुरुष एकेरीच्या अन्य सामन्यात रूडने इटलीच्या गुइलिओ झेप्पिइरीला ६-३, ६-२, ४-६, ७-५ असे पराभूत केले. रुब्लेव्ह फ्रान्सच्या कॉरेन्टिन मॉटेटला ६-४, ६-२, ३-६, ६-३ असे नमवले. त्तर, नॉरीने फ्रान्सच्या लुकास पॉइलेवर ६-१, ६-३, ६-३ असा सरळ सेटमध्ये विजय नोंदवला.महिला एकेरीत दुसऱ्या मानांकित सबालेन्काने इरिना श्यमानोव्हिचला ७-५, ६-२ असे सरळ सेटमध्ये पराभूत केले. तर, कसात्किनाने चेक प्रजासत्ताकच्या मार्केटा वोड्रोसोव्हाला ६-३, ६-४ असे नमवले. रायबाकिनाने चेक प्रजासत्ताकच्या लिंडा नोस्कोव्हावर ६-३, ६-३ असा विजय साकारला.
