“हे क्रिकेट नाहीये, हे फक्त…”, कोच गौतम गंभीर भारताच्या ऐतिहासिक विजयानंतरही संतापला; कोणावर केली टीका?

बुधवारच्या सामन्यातील दोन्ही डावांमध्ये गोलंदाजांना मोठ्या अडचणींचा सामना करावा लागला. भारताने नाणेफेक जिंकून प्रथम गोलंदाजी करण्याचा निर्णय घेतला. मात्र, पुन्हा एकदा पॉवरप्लेमध्ये भारतीय गोलंदाजांना वर्चस्व गाजवता आलं नाही आणि संपूर्ण डावात धावांची लय कायम राहिली. सलामीवीर जॉन कॅम्पबेल आणि तिसऱ्या क्रमांकावर फलंदाजीला आलेल्या शे होपने ११० धावांची भागीदारी करत वेस्ट इंडिजच्या मोठ्या धावसंख्येचा पाया रचला.

गौतम गंभीर भारताच्या विजयानंतर नेमकं काय म्हणाला?

या सामन्यात तब्बल ८११ धावांचा पाऊस पडला. मात्र, सामन्यानंतर बोलताना गंभीरने गुवाहाटीच्या खेळपट्टीवर नाराजी व्यक्त केली. फलंदाज आणि गोलंदाज यांच्यात पुरेसा समतोल नसल्याचं सांगत गंभीरने खेळपट्टीवर थेट प्रश्नचिन्ह उपस्थित केलं. “खरं सांगायचं तर, फलंदाज आणि गोलंदाज यांच्यात थोडी अधिक चुरस असायला हवी, असं मला वाटतं. आपण क्रिकेटबद्दल बोलतो, पण हे क्रिकेट नव्हतं, हा फक्त फलंदाजीचा खेळ होता,” असं गंभीरने सामन्यानंतर प्रसारमाध्यमांशी बोलताना सांगितलं.

पुढे गौतम गंभीर म्हणाला, “कल्पना करा, एखादा युवा गोलंदाज या खेळपट्टीवर गोलंदाजी करत आहे आणि समोरचा संघ ४०० धावा करतो, त्यानंतर आपणही ४०० धावांचं लक्ष्य सहज गाठतो. विक्रमांच्या दृष्टीने पाहिलं तर हे नक्कीच कमाल आहे, प्रेक्षकांसाठीही हा अनुभव अप्रतिम आहे आणि प्रसारकांसाठीही ही मोठी गोष्ट आहे. पण तुम्ही मला एक खरा क्रिकेट चाहता आणि प्रशिक्षक म्हणून विचाराल, तर मला गोलंदाजांचाही विचार करावा लागतो आणि त्यांच्याबद्दल सहानुभूती असणंही गरजेचं आहे.”

श्रीलंकेकडून प्रथम फलंदाजी करताना तीन फलंदाजांनी शतकं केली. जॉन कॅम्पबेल, शे होप व अमीर जांगू यांनी शतकी खेळी साकारल्या आणि संघाला 405 धावांपर्यंत नेलं. प्रत्युत्तरात रोहित शर्मा व शुबमन गिल यांनी २५५ धावांची विक्रमी भागीदारी साकारली. रोहित शर्माने १०१ धावा तर शुबमन गिलने विक्रमी नाबाद २३३ धावांची खेळी केली आणि भारताला सहज सोपा विजय मिळवून दिला.