Urvil Patel 36 balls century against Uttarakhand in SMAT 2024 : सध्या सुरू असलेल्या सय्यद मुश्ताक अली ट्रॉफी २०२४ मध्ये गुजरातचा फलंदाज उर्विल पटेल धुमाकूळ घालत आहे. या फलंदाजाने मंगळवारी इंदूरमध्ये उत्तराखंडविरुद्धच्या सामन्यात ३६ चेंडूत शतक झळकावले. काही दिवसांपूर्वी उर्विलने सर्वात वेगवान टी-२० शतक झळकावणारा भारतीय फलंदाज बनून इतिहास रचला होता. आता त्याने ४१ चेंडूत ११५ धावांची नाबाद खेळी केली आणि गुजरातने उत्तराखंडवर आठ विकेट्स राखून विजय मिळवला.
सलामी देताना उर्विल पटेलने २८० च्या तुफानी स्ट्राईक रेटने फलंदाजी करताना ८ चौकार आणि ११ षटकारांच्या मदतीने नाबाद ११५ धावा केल्या. यावेळी त्याने ३६ चेंडूत आपले शतक पूर्ण केले. टी-२० मधील भारताचे हे चौथे जलद शतक आहे. आता उर्विलने नाबाद ११५ धावांच्या खेळीच्या जोरावर उर्विलने टी-२० मध्ये गुजरातच्या फलंदाजाचा सर्वोच्च वैयक्तिक धावसंख्येचा स्वतःचा विक्रम मोडला. याआधी उर्विलने ११३ धावा केल्या होत्या.
आयपीएल मेगा लिलावात राहिला अनसोल्ड –
आयपीएल २०२५ च्या मेगा लिलावात उर्विल पटेलला कोणीही विकत घेतले नाही. पण या निराशेचा त्याच्यावर काही परिणाम झाला नाही. काही दिवसांपूर्वी त्याने त्रिपुराविरुद्ध अवघ्या २८ चेंडूत शतक झळकावले होते. हे जगातील दुसरे सर्वात वेगवान शतक आहे. सर्वात वेगवान शतकाचा विक्रम एस्टोनियाच्या साहिल चौहानच्या नावावर आहे, ज्याने २७ चेंडूत शतक झळकावले होते. उर्विल पटेल जरी आयपीएलचा भाग आहे. २०२३ मध्ये तो गुजरात टायटन्सचा भाग होता. मात्र, त्याला खेळण्याची संधी मिळाली नव्हती. यानंतर मग त्याला संघातून रिलीज करण्यात आले आणि नंतर कोणीही त्याला पुन्हा विकत घेतले नाही.
गुजरातने अवघ्या १३.१ षटकांत गाठले लक्ष्य –
u
u
या सामन्यात प्रथम फलंदाजी करताना उत्तराखंडने १८६ धावांचे आव्हानात्मक लक्ष्य ठेवले होते. प्रत्युत्तरात उर्विल पटेलच्या शानदार खेळीमुळे गुजरातने अवघ्या १३.१ षटकांत लक्ष्य गाठले. आर्या देसाईनेही १३ चेंडूत २३ धावा केल्या. उत्तराखंडच्या गोलंदाजांनी खराब कामगिरी केली. अग्रिम तिवारी हा सर्वात महागडा गोलंदाज ठरला. त्याने ३ षटकात ५६ धावा दिल्या. उत्तराखंडच्या फलंदाजीबद्दल, बोलायचे झाले तर समर्थ आरने ३९ चेंडूत ५४ धावा, कुणाल चडेलने २७ चेंडूत ४३ धावा आणि आदित्य तरेने २६ चेंडूत ५४ धावा केल्या. गुजरातकडून विशाल जैस्वालने सर्वोत्तम गोलंदाजी करत ४ षटकांत ४ विकेट्स घेतल्या.
