Gukesh vs Carlsen: ‘कमजोर खेळाडू’ म्हणून हिणवणाऱ्या कार्लसनला भारताच्या गुकेशनं हरवलं, पराभवानंतर मॅग्नसला करावं लागलं कौतुक!

मॅग्नसचं गर्वहरण, गुकेशचा सलग दुसरा विजय

जागतिक बुद्धिबळपटूंमध्ये मॅग्नस कार्लसनचं नाव सध्या सर्वोच्च शिखरावर आहे. पण याच कार्लसनला भारताच्या गुकेशनं सलग दुसऱ्यांदा दोन वेगवेगळ्या प्रकारांमध्ये पराभूत करण्याची किमया साध्य केली आहे. विशेष म्हणजे गुकेशची खेळण्याची पद्धत ही क्लासिक असूनही रॅपिड अँड ब्लिट्झ या अवघड प्रकारात गुकेशनं मॅग्नस कार्लसनला मोठ्या हिकमतीनं खेळत हरवून दाखवलं. स्पर्धा सुरू होण्याआधी गुकेशला ‘कमजोर खेळाडू’ म्हणून हिणवणाऱ्या कार्लसनला गुकेशनं आपल्या खेळातून सडेतोड उत्तर दिलं.

गुकेशबाबत काय म्हणाला होता मॅग्नस कार्लसन?

मॅग्नस कार्लसननं स्पर्धा सुरू होण्यापूर्वी माध्यमांशी बोलताना गुकेश या स्पर्धेतला आणि या प्रकारातला एक कमजोर खेळाडू असल्याचं म्हटलं होतं. “गुकेश रॅपिड अँड ब्रिट्झ प्रकारात कितपत पुढे जाऊ शकेल याबाबत शंका आहे. गुकेशविरोधात या स्पर्धेदरम्यान होणाऱ्या सामन्यांमध्ये (रॅपिड प्रकारातील एक व ब्लिट्झ प्रकारातील दोन) तो स्पर्धेतील काही कमजोर खेळाडूंपैकी एक असल्याप्रमाणे खेळेन”, असं कार्लसन म्हणाला होता. “या स्पर्धेदरम्यान या प्रकारात गुकेशची कामगिरी चांगली होईल असं त्यानं काहीही करून दाखवलेलं नाही. त्यामुळे या प्रकारात तो चांगला खेळाडू आहे किंवा नाही हे अजून सिद्ध व्हायचंय. त्याला खूप काही करून दाखवायचंय”, असंही कार्लसन म्हणाला होता.

पराभवानंतर काय म्हणाला मॅग्नस कार्लसन?

गुकेशसमोर पराभव पत्कराव्या लागलेल्या नॉर्वेच्या मॅग्नस कार्लसननं आपली चूक मान्य करून गुकेशच्या उत्तम खेळींचं कौतुक केलं आहे. “गुकेश खूप उत्तम खेळतो आहे. अजून या स्पर्धेत खूप काही घडायचं आहे. पण या स्पर्धेत सलग पाच सामने जिंकणं ही छोटी गोष्ट नाही”, असं कार्लसन सामन्यानंतर दिलेल्या प्रतिक्रियेत म्हणाला.

“मी अत्यंत वाईट खेळ केला. पण या विजयाचं पूर्ण श्रेय हे गुकेशच्या चांगल्या खेळाचं आहे. तो खूप चांगलं खेळतोय. जोखीम घेतोय. या स्पर्धेत आत्तापर्यंत मी खूप वाईट खेळलो आहे. त्याची शिक्षा यावेळी मला मिळाली. या सामन्यात सुरुवातीला मला खूप चांगली संधी होती. पण त्यानं जोखीम घेतली आणि चांगल्या चाली खेळल्या. त्याउलट मला वेळ अपुरा पडला आणि ते सगळं मी व्यवस्थित सांभाळू शकलो नाही”, अशा शब्दांत मॅग्नस कार्लसननं आपली चूक मान्य केली.

माजी वर्ल्ड चॅम्पियन गॅरी कास्पारोव्ह यांनीही केलं गुकेशचं कौतुक

दरम्यान, या सामन्यादरम्यान कॉमेंट्री करणारे गॅरी कास्पारोव्ह यांनीदेखील गुकेशचं कौतुक केलं. “गुकेशशी खेळायचं म्हणजे कम्प्युटरशी खेळण्यासारखं आहे. तो सर्वात जिद्दी खेळाडू आहे. प्रत्येक गेममध्ये त्याच्याकडे खूप साऱ्या लाईफ असतात. त्यामुळे तुम्हाला त्याला प्रत्येक गेममध्ये किमान पाच वेळा तरी हरवावं लागतं. तुम्ही कदाचित त्याच्याविरुद्ध जिंकत देखील असाल, पण कुठल्यातरी एका क्षणी तुमचं लक्ष विचलित होतं आणि तुम्ही पराभूत झालेले असता”, अशा शब्दांत गॅरी कास्पारोव्ह यांनी गुकेशवर स्तुतिसुमनं उधळली आहेत.