MI vs RR: हार्दिक परतला, पण ‘या’ स्टार खेळाडूचा पत्ता कट? राजस्थानविरुद्धच्या सामन्याआधी मुंबईच्या संघात मोठे बदल

हार्दिक पंड्या आज खेळणार का?

राजस्थान रॉयल्सविरुद्ध होणाऱ्या सामन्याच्या एक दिवसाआधी झालेल्या पत्रकार परिषदेत बोलताना पारस म्हांब्रे यांनी हार्दिक पंड्याच्या फिटनेसबाबत अपडेट दिली आहे. ते म्हणाले, “हार्दिक पंड्या खेळण्यासाठी उपलब्ध आहे. त्याने नेट्समध्ये सराव केला असून, तो पूर्णपणे फिट आहे. तो दुखापतग्रस्त झाला नव्हता, तो फक्त आजारी होता. त्यामुळे तो गेल्या सामन्यात खेळू शकला नव्हता.”

मुंबई इंडियन्सची प्लेईंग ११ बदलणार?

राजस्थान रॉयल्सविरुद्ध होणाऱ्या सामन्यासाठी मुंबई इंडियन्सच्या प्लेईंग ११ मध्ये बदल पाहायला मिळू शकतो. हार्दिक पंड्या गेल्या सामन्यातून बाहेर होता. त्यामुळे त्याच्या जागी कॉर्बिन बॉशला संधी देण्यात आली होती. एकाच सामन्यात ४ परदेशी खेळाडूंना खेळण्याची संधी दिली जाते. त्यामुळे ट्रेंट बोल्टला प्लेईंग ११ मधून बाहेर राहावं लागलं. आता हार्दिक पंड्या आल्यानंतर कॉर्बिन बॉशला विश्रांती दिली जाऊ शकते. तर ट्रेंट बोल्टला प्लेईंग ११ मध्ये संधी दिली जाऊ शकते. तसेच दीपक चहर किंवा शार्दुल ठाकूरला प्लेईंग ११ मधून बाहेरचा रस्ता दाखवला जाऊ शकतो.

दिल्ली कॅपिटल्स संघाविरुद्ध झालेल्या सामन्यात मुंबई इंडियन्स संघाला दारूण पराभवाचा सामना करावा लागला होता. या सामन्यात हार्दिक पंड्याची कमतरता जाणवली आहे. या सामन्यातील पहिल्या डावात फलंदाजी करताना मुंबई इंडियन्सने १६२ धावा केल्या होत्या. हे आव्हान दिल्ली कॅपिटल्स संघाने सहज पूर्ण केलं. दिल्लीने ११ चेंडू शिल्लक ठेवून आणि ६ गडी राखून विजय मिळवला. राजस्थान रॉयल्सविरुद्ध होणाऱ्या सामन्यात मुंबईचा संघ दमदार पुनरागमन करण्याच्या प्रयत्नात असणार आहे.