हरमनप्रीत कौरचा वर्ल्ड रेकॉर्ड! महिला क्रिकेट इतिहासात अशी कामगिरी करणारी जगातील पहिली खेळाडू

भारत आणि ऑस्ट्रेलिया महिला संघांमधील दुसऱ्या टी-२० सामन्याची नाणेफेक भारतीय संघाने जिंकत प्रथम गोलंदाजीचा निर्णय घेतला. ऑस्ट्रेलियाकडून जॉर्जिया वॉल व बेथ मुनी यांनी संघाला दणक्यात सुरूवात करून दिली. पहिल्या विकेटसाठी या दोघींनी १२८ धावांची भागीदारी रचली. बेथ मुनीने ४६ धावांची खेळी केली, तर जॉर्जिया वॉलने ५७ चेंडूत ११ चौकार व एका षटकारासह ८८ धावा केल्या. याशिवाय इतर सर्व फलंदाज भारताच्या गोलंदाजीसमोर धावा करू शकले नाहीत.

कॅनबेरामध्ये सुरू असलेल्या हा टी-२० सामना हरमनप्रीत कौरच्या कारकिर्दीतील ३५६वा सामना आहे. यासह हा सामना खेळण्यासाठी उतरताच हरमनप्रीत महिला क्रिकेट इतिहासात सर्वाधिक आंतरराष्ट्रीय सामने खेळणारी जगातील पहिली खेळाडू ठरली आहे. तिच्याआधी हा विक्रम सुझी बेट्सच्या नावे होता. हा विश्वविक्रम न्यूझीलंडच्या क्रिकेट दिग्गज सुझी बेट्सचा विक्रम मोडून आपल्या नावे केला आहे, जिने तिच्या आंतरराष्ट्रीय कारकिर्दीत ३५५ सामने खेळले होते.

तिसऱ्या स्थानावर या यादीत ऑस्ट्रेलियाची अष्टपैलू खेळाडू एलिस पेरी आहे, जिने आतापर्यंत ३४९ आंतरराष्ट्रीय सामने खेळले आहेत. चौथ्या स्थानावर भारताची महान फलंदाज मिताली राज आहे, जिने ३३३ सामने खेळले आहे. तर पाचव्या स्थानी इंग्लंड संघाची चार्लोट एडवर्ड्स आहे, जिने आपल्या कारकिर्दीत ३०९ सामने खेळल आहेत.

महिला आंतरराष्ट्रीय क्रिकेटमध्ये सर्वाधिक सामने खेळणारे खेळाडू

हरमनप्रीत कौर – भारत – ३५६ सामने
सुझी बेट्स – न्यूझीलंड – ३५५ सामने
एलिस पेरी – ऑस्ट्रेलिया – ३४९ सामने
मिताली राज – भारत – ३३३ सामने
चार्लोट एडवर्ड्स – इंग्लंड – ३०९ सामने

भारत आणि ऑस्ट्रेलिया महिला संघांमध्ये तिन्ही फॉरमॅटमधील मालिका खेळवल्या जाणार आहेत. तीन सामन्यांच्या टी-२० मालिकेपासून सुरूवात झाली असून भारतीय संघ मालिकेत १-०ने आघाडीवर आहे. तर यानंतर तीन सामन्यांची वनडे मालिका खेळवली जाणार आहे आणि त्यानंतर एकमेव कसोटी सामनादेखील खेळवला जाणार आहे.