कनिष्ठ विश्वचषक हॉकी स्पर्धा : भारताची उपांत्य फेरीत धडक ; शरदानंद तिवारीच्या गोलमुळे बेल्जियमवर सरशी

कलिंगा स्टेडियमवर झालेल्या या उपांत्यपूर्व फेरीतील सामन्याच्या सुरुवातीला बेल्जियमने आक्रमक शैलीत खेळ केला

भुवनेश्वर : शरदानंद तिवारीने केलेल्या गोलच्या जोरावर भारताने बलाढय़ बेल्जियमवर १-० अशी सरशी साधत कनिष्ठ विश्वचषक हॉकी स्पर्धेच्या उपांत्य फेरीत धडक दिली. या फेरीत गतविजेत्या भारतापुढे जर्मनीचे आव्हान असेल.

लखनऊ येथे २०१६ साली झालेल्या मागील कनिष्ठ विश्वचषकात भारताने बेल्जियमलाच धूळ चारत दुसऱ्यांदा जगज्जेते होण्याचा मान मिळवला होता. या पराभवाची परतफेड करण्यासाठी बेल्जियमचा युवा संघ उत्सुक होता. परंतु भारताने शरदानंदचा गोल, भक्कम बचाव आणि राखीव गोलरक्षक पवनच्या उत्कृष्ट खेळामुळे पुन्हा बेल्जियमवर वर्चस्व गाजवले.

भुवनेश्वर येथील कलिंगा स्टेडियमवर झालेल्या या उपांत्यपूर्व फेरीतील सामन्याच्या सुरुवातीला बेल्जियमने आक्रमक शैलीत खेळ केला. मात्र, त्यांचे आक्रमण थोपवण्यात भारताच्या बचाव फळीला यश आले. पहिल्या सत्रात भारताच्या उत्तम सिंहने गोल करण्याचा प्रयत्न केला, परंतु त्याने मारलेला फटका बेल्जियमचा गोलरक्षक बोरिस फेल्डहॅमने अडवला. भारताला दुसऱ्या सत्रात २१व्या मिनिटाला पेनल्टी कॉर्नर मिळाला. यावर शरदानंदने गोल केल्यामुळे यजमानांना १-० अशी आघाडी मिळाली. मध्यंतरानंतर बेल्जियमच्या आक्रमणाला अधिक धार आली. त्यातच भारताने चेंडूवर ताबा ठेवण्याच्या प्रयत्नात चुका केल्या. चौथ्या सत्रात प्रशांत चौहानच्या जागी मैदानात आलेल्या राखीव गोलरक्षक पवनने रोमन दुवेकोट आणि डीने डी विंटरला गोल करण्यापासून रोखत भारताला सामना जिंकवून दिला.

उपांत्य फेरीचे सामने

(शुक्रवार ३ डिसेंबर)

’  भारत विरुद्ध जर्मनी

’  अर्जेंटिना विरुद्ध फ्रान्स

लोकसत्ता आता टेलीग्रामवर आहे. आमचं चॅनेल (@Loksatta) जॉइन करण्यासाठी येथे क्लिक करा आणि ताज्या व महत्त्वाच्या बातम्या मिळवा.

मराठीतील सर्व क्रीडा बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App. ताज्या बातम्या (latest News) फेसबुक , ट्विटरवरही वाचता येतील.

Web Title: Hockey men junior world cup 2021 india vs belgium india beat belgium zws

Next Story
दुसऱ्या कसोटीत पावसाचा खेळ? ; अवकाळी पावसामुळे मुंबईतील वानखेडे स्टेडियम जलमय
फोटो गॅलरी