ICC ODI Ranking: बाबर आझमच्या आयसीसी रॅकिंगला शुबमन गिल ठरला धोका, जाणून घ्या कोण आहे कुठे?

आयसीसीने बुधवारी (२७ सप्टेंबर) जाहीर केलेल्या नवीन क्रमवारीत शुबमन गिलने दुसऱ्या क्रमांकावर आपले स्थान मजबूत केले असून तो आता पहिल्या क्रमांकावर असलेला फलंदाज बाबर आझमच्या जवळ आहे. उजव्या हाताचा फलंदाज शुबमन अलीकडच्या काही आठवड्यांत उत्कृष्ट फॉर्ममध्ये आहे. भारतीय संघासाठी आगामी वर्ल्डकप पाहता ही जमेची बाब आहे.

शुबमन गिल आशिया कप २०२३ मध्ये सर्वाधिक धावा करणारा खेळाडू होता, जिथे त्याने ७५ पेक्षा जास्त सरासरीने ३०२ धावा केल्या. ऑस्ट्रेलियाविरुद्ध सुरू असलेल्या मालिकेतही तो सर्वाधिक धावा करणारा फलंदाज आहे. शुबमन गिलने पहिल्या एकदिवसीय सामन्यात ७४ धावा आणि दुसऱ्या एकदिवसीय सामन्यात १०४ धावा केल्या आणि तिसऱ्या एकदिवसीय सामन्याला विश्रांती देण्यात आली.

दक्षिण आफ्रिकेचा रॅसी व्हॅन डर डुसेन आयसीसी क्रमवारीत शुबमन गिलपेक्षा ७४३ रेटिंग गुणांसह तिसऱ्या क्रमांकावर आहे. चौथ्या स्थानावर आयर्लंडचा हॅरी टेक्टर ७२९ रेटिंग गुणांसह आहे. अव्वल दहामध्ये गिलनंतर विराट कोहली हा एकमेव भारतीय फलंदाज आहे कारण तो ९व्या क्रमांकावर आहे. दरम्यान, ऑस्ट्रेलियाविरुद्ध चांगली कामगिरी केल्यानंतर श्रेयस अय्यर आणि के.एल. राहुल यानेही आयसीसीच्या ताज्या क्रमवारीत प्रगती केली आहे. अय्यरने आठ स्थानांनी प्रगती करत ३०व्या स्थानावर, तर राहुलने सहा स्थानांनी झेप घेत ३३व्या स्थानावर झेप घेतली आहे. अय्यरने दुसऱ्या एकदिवसीय सामन्यात शानदार शतक झळकावले तर राहुलने पहिल्या दोन वन डेत अर्धशतके झळकावली.

हेही वाचा: Asian Games 2023: गोल्डन गर्ल्स! नेमबाजीत भारताच्या मुलींनी फडकवला झेंडा, कोण आहेत मनू भाकर, ईशा आणि रिदम सांगवान?

शुबमन गिलची प्रतीक्षा वाढली

वेस्ट इंडिज दौऱ्यावर संघर्ष करणाऱ्या शुबमन गिलने आशिया कप २०२३ मध्ये शानदार पुनरागमन केले. या प्रतिष्ठेच्या स्पर्धेत तो सर्वाधिक धावा करणारा फलंदाज होता. ऑस्ट्रेलियाविरुद्धच्या ३ सामन्यांच्या वन डे मालिकेतही त्याने आशिया चषकाची गती कायम ठेवली. तो सध्या आंतरराष्ट्रीय क्रिकेटमध्ये धुमाकूळ घालत आहे. आता गिलला ५ ऑक्टोबरपासून भारतात खेळल्या जाणाऱ्या एकदिवसीय विश्वचषकात पहिल्या क्रमांकावर येण्यासाठी वाट पाहावी लागणार आहे.