ICC T20 World Cup 2024, IND vs AFG Highlights: टी-२० विश्वचषक २०२४ मध्ये टीम इंडियाची विजयी मालिका सुरूच आहे. गुरुवारी झालेल्या सुपर८ सामन्यात भारताने अफगाणिस्तानविरुद्ध ४७ धावांनी विजय मिळवला. बार्बाडोसच्या केन्सिंग्टन ओव्हल मैदानावर भारताने प्रथम फलंदाजी करताना १८२ धावांचे लक्ष्य ठेवले होते. प्रत्युत्तरात अफगाणिस्तानचा संघ निर्धारित २० षटकांत १३४ धावांत गारद झाला. अफगाणिस्तानकडून अजमतुल्ला ओमरझाई (२६) याने सर्वाधिक धावा केल्या. नजीबुल्ला झदरन (१९), गुलबदिन नायब (१७), आणि मोहम्मद नबी (१४), नूर अहमद (१२) आणि सलामीवीर रहमानउल्ला गुरबाज यांनी ११ धावांचे योगदान दिले. इब्राहिम झादरान (८) आणि हजरतुल्ला झाझई (२) यांनाही विशेष काही करता आले नाही. भारताकडून जसप्रीत बुमराहने भेदक गोलंदाजी केली. त्याने चार षटकांत ७ धावा देऊन ३ विकेट घेतले. अर्शदीप सिंगनेही तीन विकेट घेतले. तर कुलदीप यादवने दोन, अक्षर पटेल आणि रवींद्र जडेजाने प्रत्येकी एक विकेट घेतली. तत्पूर्वी, भारताने नाणेफेक जिंकून प्रथम फलंदाजी करताना ८ बाद १८१ धावा केल्या होत्या. सूर्यकुमार यादवने २८ चेंडूत पाच चौकार आणि तीन षटकारांच्या मदतीने झंझावाती अर्धशतक झळकावले. भारताची सुरूवात अजिबातच चांगली झाली नाही. कर्णधार रोहित शर्माने (८) स्वस्तात विकेट गमावली. विराट कोहलीने (२४) ऋषभ पंत (२०) सोबत दुसऱ्या विकेटसाठी ४३ धावांची भागीदारी केली. शिवम दुबे (१०) फार मोठी खेळी करू शकला नाही. सूर्यकुमारने हार्दिक पांड्यासोबत (३२) पाचव्या विकेटसाठी ६० धावांची महत्त्वपूर्ण भागीदारी केली. १७व्या षटकात सूर्या आणि १८व्या षटकात हार्दिक पॅव्हेलियनमध्ये परतला. सूर्यकुमारला सामनावीर म्हणून निवडण्यात आले. रवींद्र जडेजाने ७ आणि अक्षर पटेलने १२ धावांचे योगदान दिले. अफगाणिस्तानकडून कर्णधार रशीद खान आणि फजलहक फारुकीने प्रत्येकी तीन विकेट घेतले. नवीन उल हकला एक विकेट मिळाली.
