टी२० विश्वचषकाच्या आठव्या सामन्यात वेस्ट इंडिजने झिम्बाब्वेचा ३१ धावांनी पराभव केला. होबार्टमध्ये बुधवारी (१९ ऑक्टोबर) वेस्ट इंडिजने नाणेफेक जिंकून प्रथम फलंदाजी करत झिम्बाब्वेसमोर १५४ धावांचे लक्ष्य ठेवले होते. प्रत्युत्तरात झिम्बाब्वेचा संघ केवळ १२२ धावा करू शकला. या विजयासह वेस्ट इंडिजचा संघ सुपर १२ मध्ये पोहोचण्याच्या शर्यतीत कायम आहे. वेस्ट इंडिजचा पहिला सामना स्कॉटलंडविरुद्ध क्वालिफायर फेरीत हरला. अशा स्थितीत विंडीजसाठी हा करा किंवा मरो असा सामना होता आणि कॅरेबियन खेळाडूंनी चमकदार कामगिरी करत आपल्या संघाला बाद होण्यापासून वाचवले.

वेस्ट इंडिजकडून अल्झारी जोसेपने शानदार गोलंदाजी करत चार बळी घेतले. त्याचवेळी जेसन होल्डरने तीन बळी घेतले. अकिल हुसेन, ओबेद मॅकॉय आणि ओडियन स्मिथ यांना प्रत्येकी एक विकेट मिळाली. झिम्बाब्वेकडून जोंगवेने सर्वाधिक २९ धावा केल्या. त्याचवेळी मधेवरेने २७ धावांची खेळी खेळली. १५४ धावांचा पाठलाग करताना झिम्बाब्वेची सुरुवात चांगली झाली. पाच षटके खेळली गेली तोपर्यंत झिम्बाब्वेने दोन गडी गमावून ४७ धावा केल्या होत्या, पण झिम्बाब्वेच्या मधल्या फळीला फारसे काही करता आले नाही. झिम्बाब्वेने १७ धावांच्या अंतरात चार गडी गमावले आणि अखेरीस संपूर्ण संघ १८.२ षटकांत १२२ धावांत गारद झाला.

या सामन्याच्या पहिल्या डावात झिम्बाब्वेच्या सिकंदर रझाने धोकादायक गोलंदाजी केली. त्याने चार षटकांत १९  धावा देत तीन बळी घेतले. मुजारबानीला दोन आणि शॉन विल्यम्सला एक गडी बाद केला. वेस्ट इंडिजचा काइल मेयर्स १२ चेंडूत १३ धावा काढून बाद झाला. त्याने आपल्या खेळीत दोन चौकार मारले. ब्लेसिंग मुजारबानीच्या चेंडूवर तो यष्टिरक्षक रेगिस चकाबवाकरवी झेलबाद झाला. त्याच्यानंतर दहाव्या षटकात एविन लुईस बाद झाला. सिकंदर रझाच्या चेंडूवर तो मिल्टन शुम्बाने झेलबाद झाला. लुईसने १८ चेंडूत १५ धावा केल्या. त्याने जॉन्सन चार्ल्ससोबत दुसऱ्या गड्यासाठी ३८ चेंडूत ४९ धावांची भागीदारी केली.

हेही वाचा : T20 World Cup 2022: टीम इंडियाला संघातील उणीवा दूर करण्याची शेवटची संधी हुकली, आता थेट भिडणार पाकिस्तानशी  

हा सामना वेस्ट इंडिजसाठी करा किंवा मरो असा आहे. स्कॉटलंडविरुद्धचा पहिला सामना तो हरला होता. जर तो आज हरला तर तो स्पर्धेतून बाद होण्याच्या जवळ असेल. त्याचबरोबर झिम्बाब्वेला विजय मिळाला तर तो सुपर-१२ चा दावेदार ठरेल. गेल्या सामन्यात त्यांनी आयर्लंडचा पराभव केला होता.