न्यूयॉर्क : भारताच्या शीर्ष फळीतील फलंदाजांचा प्रयत्न अमेरिकेविरुद्ध बुधवारी होणाऱ्या ट्वेन्टी-२० विश्वचषक क्रिकेट सामन्यात चांगली कामगिरी करत आगामी सामन्यांकरिता लय मिळवण्याचा राहील. अमेरिकेच्या संघात अनुभवाची कमतरता असली, तरीही त्यांनी चमकदार कामगिरी केली आहे. त्यामुळे भारतीय संघ त्यांना हलक्याने घेणार नाही. भारतीय संघाने या सामन्यात विजय नोंदवल्यास त्यांचे तीन सामन्यांत आठ गुण होतील. त्यानंतर त्यांचे ‘सुपर एट’ फेरीतील स्थानही निश्चित होईल.
हेही वाचा >>> T20 WC 2024 : मोठ्या उलथापालथीने बिघडवले बड्या संघांचे गणित, लहान संघांनी दिला दणका, पाहा ‘सुपर-एट’चे समीकरण
नसाऊ कौंटी मैदान हे फलंदाजांसाठी अनुकूल नसल्याचे गेल्या काही सामन्यांतून समोर आले आहे. यजमान अमेरिकेने सर्वांच्या अपेक्षांच्या विपरीत कामगिरी केली असून त्यांनी पहिल्या लढतीत पाकिस्तानला नमवत लक्ष वेधले. अमेरिकेच्या संघात असे अनेक खेळाडू आहेत, ज्यांना भारताकडून खेळण्याची संधी मिळाली नाही. यामध्ये सौरभ नेत्रावळकर आणि हरमीत सिंग यांचाही समावेश आहे. या दोघांनीही संघाकडून चमकदार कामगिरी केली आहे. खेळपट्टीमुळे दोन्ही संघांमधील अंतरही कमी केले आहे. मात्र, तरीही अमेरिकेला भारतीय संघाला नमवणे सोपे नसेल. अमेरिकेच्या संघात मूळचे भारतीय असलेले आठ खेळाडू आहेत. यासह पाकिस्तानातील मूळचे दोन, वेस्ट इंडिज, न्यूझीलंड, दक्षिण आफ्रिका आणि नेदरलँड्सचा प्रत्येकी एक खेळाडू त्यांच्या संघात आहे. संघात मोनांक पटेल, हरमीत, नेत्रावळकर, जेसी सिंग व नोशतुश केंजीगे यांचा भारताच्या फलंदाजांसमोर त्यांचा चांगला कस लागेल.
● वेळ : रात्री ८ वा.
● थेट प्रक्षेपण : स्टार स्पोर्ट्स १, २, १ हिंदी, हॉटस्टार अॅप.
