Shubman Gill over KL Rahul: शनिवारी (मार्च) नरेंद्र मोदी स्टेडियमवर बॉर्डर-गावसकर ट्रॉफीच्या चौथ्या आणि शेवटच्या कसोटीच्या तिसऱ्या दिवशी टीम इंडियाचा सलामीवीर शुबमन गिलने तुफानी शतक झळकावले. ऑस्ट्रेलियाविरुद्ध माजी उपकर्णधार केएल राहुलच्या जागी त्याला स्थान देण्यात आले आहे. ऑफस्पिनर नॅथन लायनने शुबमन गिलला पायचीत केले. त्याने २३५ चेंडूत १२८ धावा केल्या. त्यात १२ चौकार आणि एका षटकाराचा समावेश होता.
कर्णधार रोहित शर्मा आणि प्रशिक्षक राहुल द्रविड यांच्याकडून अनेक संधी मिळूनही राहुल फॉर्ममध्ये झुंजत आहे. ऑस्ट्रेलियाविरुद्ध कसोटी क्रिकेटमध्ये शतक झळकावणारा गिल सर्वात तरुण भारतीय ठरला हे पाहून सोशल मीडिया शांत राहू शकला नाही. भारतासाठी शुबमन गिलचे हे दुसरे कसोटी शतक होते. अशा खेळपट्टीवर जिथे फलंदाजांना त्यांच्या संधीचा पुरेपूर वापर करण्याची संधी होती, गिलने दोन्ही हातांनी संधी साधली आणि शतक ठोकून भारतासाठी प्लेइंग इलेव्हनमध्ये आपले स्थान निश्चित केले.
तिसर्‍या दिवशी भारताची चांगली सुरुवात झाली. काल दिवस संपताना शुबमन गिल आणि रोहितने १० षटकात ३६ धावा केल्या होत्या. तिसऱ्या दिवशी, ५८ चेंडूत ३५ धावा करून कुहनेमनने रोहितला झेलबाद केले. त्यानंतर चेतेश्वर पुजारा आणि शुबमन गिलने तिसऱ्या विकेटसाठी चांगली भागीदारी केली. मात्र पुजारा ४२ धावा काढून बाद झाला. नंतर, गिल आणि कोहली भारतासाठी चांगले खेळत होते मात्र या तरुण खेळाडूला अनुभवी नॅथन लियॉनने बाद केले.
तत्पूर्वी, उस्मान ख्वाजाने ४२२ चेंडूत १८० धावांची जबरदस्त खेळी करून ऑस्ट्रेलियन संघाला मोठ्या धावसंख्येकडे नेले आणि कॅमेरून ग्रीननेही शतक झळकावले, हे त्याचे ऑस्ट्रेलियासाठी रेड-बॉल क्रिकेटमधील पहिले शतक आहे. स्टीव्ह स्मिथच्या संघाने पहिल्या डावात भारतीय गोलंदाजी आक्रमणाची मर्यादेपर्यंत कसोटी पाहत एकूण ४८० धावा केल्या. सध्या टीम इंडियाच्या तीन विकेट्सच्या बदल्यात २८९ धावा झाल्या आहेत.
