scorecardresearch

IND vs ENG 5th Test : चेतेश्वर पुजाराच्या नावे झाली ‘नको त्या’ विक्रमाची नोंद

कसोटी सामन्याच्या पहिल्या डावात पुजारा चांगली कामगिरी करू शकला नाही.

James Anderson Cheteshwar Pujara Wicket
फोटो सौजन्य – इंडियन एक्सप्रेस

गेल्या वर्षी अर्धवट राहिलेली पाच सामन्यांची कसोटी मालिका पूर्ण करण्यासाठी भारतीय संघ इंग्लंड दौऱ्यावर गेला आहे. या दौऱ्यापूर्वी चेतेश्वर पुजाराने ससेक्स कौंटीसाठी चांगली कामगिरी केली होती. पुजाराने पाच सामन्यांत ७००हून अधिक धावा केल्या होत्या. याच कारणामुळे त्याचा इंग्लंडविरुद्धच्या एजसबस्टन कसोटीसाठी संघात समावेश करण्यात आला. मात्र, या कसोटी सामन्याच्या पहिल्या डावात पुजारा चांगली कामगिरी करू शकला नाही. जेम्स अँडरसनने त्याला अवघ्या १३ धावांवर माघारी धाडले. पुजारा बाद होताच त्याच्या नावावर एका विचित्र विक्रमाची नोंद झाली. कसोटी क्रिकेटमध्ये चेतेश्वर पुजारा १२व्या वेळी अँडरसनकडून बाद झाला.

जेम्स अँडरसनला इंग्लंडच्या कसोटी क्रिकेटमधील सर्वात महत्त्वाचा गोलंदाज मानले जाते. वेळोवेळी त्याने आपले महत्त्व सिद्धही केले आहे. सध्या सुरू असलेल्या भारताविरुद्धच्या कसोटी सामन्यातील पहिल्या दिवशी त्याने अँडरसनने चांगली कामगिरी करत तीन भारतीय फलंदाजांना बाद केले. चेतेश्वर पुजारा हा या सामन्यातील त्याचा दुसरा बळी ठरला.

अँडरसनने कसोटी क्रिकेटमध्ये सर्वाधिक वेळा बाद केलेल्या फलंदाजांच्या यादीत पुजारा अव्वल स्थानावर गेला आहे. अँडरसनने पुजाराला १२ वेळा बाद केले. यापूर्वी त्याने ऑस्ट्रेलियन वेगवान गोलंदाज पीटर सीडलला ११ वेळा बाद केले होते. याशिवाय त्याने ऑस्ट्रेलियाचा सलामीवीर डेव्हिड वॉर्नरला १० वेळा, सचिन तेंडुलकर, मायकेल क्लार्क आणि अझहर अली यांना प्रत्येकी नऊ वेळा बाद केले आहे.

मराठीतील सर्व क्रीडा ( Krida ) बातम्या वाचा. मराठी ताज्या बातम्या (Latest Marathi News) वाचण्यासाठी डाउनलोड करा लोकसत्ताचं Marathi News App.

Web Title: Ind vs eng edgbaston test james anderson took cheteshwar pujara wicket for the 12th time vkk