IND vs NZ Mohammad Kaif tweet on Rohit Sharma and team India : भारत विरुद्ध न्यूझीलंड कसोटी मालिका सुरू होण्यापूर्वी रोहित शर्माच्या नेतृत्वाखालील यजमान संघ पहिल्या दिवसापासून आपला दबदबा कायम ठेवेल, असे मानले जात होते. तीन सामन्यांच्या मालिकेतील पहिला कसोटी सामना बंगळुरूच्या एम चिन्नास्वामी स्टेडियमवर खेळला जात असून, पहिल्या दिवसाचा खेळ पावसामुळे होऊ शकला नाही. दुसऱ्या दिवशी टीम इंडियाने नाणेफेक जिंकून प्रथम फलंदाजी करण्याचा निर्णय घेतला आणि येथूनच रोहित आणि कंपनीचा वाईट काळही सुरू झाला. भारताचा पहिला डाव अवघ्या ४६ धावांत आटोपला. यानंतर माजी क्रिकेटर मोहम्मद कैफने सांगितले की, या सामन्यात रोहितकडून सर्वात मोठी चूक कुठे झाली?
मोहम्मद कैफ काय म्हणाला?
मोहम्मद कैफने एक्सवर एक पोस्ट शेअर केली आहे, ज्यामध्ये तो म्हणाला, ‘जेव्हा खेळपट्टी दीर्घकाळ झाकलेली असते, तेव्हा प्रथम फलंदाजी करण्याचा निर्णय घेणे योग्य नसते. खेळपट्टीवर ओलावा निर्माण होतो. कदाचित टीम इंडियाने ही युक्ती इथे मिस केली असेल. पण न्यूझीलंडचे अप्रतिम झेल आणि गोलंदाजी करताना, ज्या प्रकारे अचूक लाइन लेन्थवर गोलंदाजी केली, त्याचे खरंच कौतुक करायला हवे.’
न्यूझीलंडसाठी मॅट हेन्री हिरो ठरला, त्याने पाच विकेट्स घेतल्या, तर भारतासाठी ऋषभ पंत सर्वाधिरक धावा करणारा फलंदाज ठरला. ऋषभ पंतने २० धावांची खेळी खेळली. त्याच्याशिवाय यशस्वी जैस्वाल हा एकमेव फलंदाज होता जो दुहेरी आकडा गाठू शकला. तो १३ धावांवर बाद झाला. भारतीय खेळपट्ट्यांवर कसोटी क्रिकेटच्या इतिहासातील ही सर्वात निच्चांकी धावसंख्या आहे.
भारताकडून विराट कोहली, केएल राहुल, सर्फराझ खान, आर अश्विन आणि रवींद्र जडेजा यांना खातेही उघडता आले नाही.
डेव्हॉन कॉनवेचे हुकले शतक –
आशियाई खेळपट्ट्यांवर भारतातीलच नव्हे तर कसोटी क्रिकेटमध्ये कोणत्याही संघाने केलेली ही सर्वात निच्चांकी धावसंख्या आहे. आता या कसोटी सामन्यात पुनरागमन करण्यासाठी भारतीय संघाला चमत्कार करावा लागणार आहे, कारण सध्या न्यूझीलंडची स्थिती अतिशय मजबूत आहे. भारताचा ऑफस्पिनर रविचंद्रन अश्विनने शानदार फलंदाजी करणाऱ्या डेव्हॉन कॉनवेला बाद करून भारताला तिसरे यश मिळवून दिले. त्यामुळे कॉनवेला आपले शतक पूर्ण करता आले नाही. त्याने १०५ चेंडूत ९१ धावा करून तो बाद झाला. अश्विनच्या चेंडूवर कॉनवेने स्वीप शॉट खेळण्याचा प्रयत्न केला, पण चेंडू थेट विकेटवर गेला. ज्यामुळे न्यूझीलंडने भारताविरुद्ध १०८ धावांची आघाडी घेतली आहे.
