डावखुरा सलामीवीर क्विंटन डीकॉकच्या (१३० चेंडूंत १२४ धावा) दिमाखदार शतकानंतरही भारतीय संघाने तिसऱ्या एकदिवसीय क्रिकेट सामन्यात यजमान दक्षिण आफ्रिकेला २८७ धावांत रोखले. केप टाऊन येथे खेळवण्यात आलेल्या या सामन्यात भारताचा कर्णधार केएल राहुलने नाणेफेक जिंकून प्रथम क्षेत्ररक्षणाचा निर्णय घेतला. भारताने या सामन्यासाठी संघात चार बदल करताना दीपक चहर आणि प्रसिध कृष्णा या वेगवान गोलंदाजांसह फिरकीपटू जयंत यादव आणि फलंदाज सूर्यकुमार यादव यांना संधी दिली. चहरने या संधीचा चांगला उपयोग करताना आफ्रिकेचा सलामीवीर जानेमन मलान (१) आणि एडीन मार्करम (१५) यांना माघारी पाठवले. तसेच कर्णधार टेम्बा बव्हूमा (८) धावचीत झाल्याने आफ्रिकेची ३ बाद ७० अशी स्थिती झाली. यानंतर डीकॉक आणि रासी वॅन डर डसेन (५९ चेंडूंत ५२) यांनी चौथ्या गडय़ासाठी १४४ धावांची भागीदारी रचत आफ्रिकेचा डाव सावरला. डीकॉकने एकदिवसीय कारकीर्दीतील १७वे शतक साकारले. परंतु त्याला १२४ धावांवर जसप्रीत बुमराने बाद केले. पुढच्याच षटकात यजुर्वेद्र चहलच्या गोलंदाजीवर स्वीप मारण्याच्या नादात डसेन माघारी परतल्याने आफ्रिकेची ३ बाद २१४ वरून ५ बाद २१८ अशी धावसंख्या झाली. अँडिले फेहलुकवायोही (४) लवकर बाद झाल्यावर डेव्हिड मिलर (३९) आणि ड्वेन प्रिटोरियस (२०) यांनी काही चांगले फटके मारले. अखेर या दोघांना प्रसिधने पॅव्हेलियनचा रस्ता दाखवला. बुमराच्या गोलंदाजीवर मोठा फटका मारताना केशव महाराज (६) बाद झाला. तर प्रसिधने सिसांडा मगालाला (०) बाद करत आफ्रिकेचा डाव २८७ धावांवर संपुष्टात आणला. संक्षिप्त धावफलक दक्षिण आफ्रिका : ४९.५ षटकांत सर्वबाद २८७ (क्विंटन डीकॉक १२४, रासी वॅन डर डसेन ५२; प्रसिध कृष्णा ३/५९, जसप्रीत बुमरा २/५२, दीपक चहर २/२३) वि. भारत