भारताचं सुपर-८ फेरीचं वेळापत्रक ठरलं! वेस्ट इंडिजसह ‘या’ संघाविरूद्ध होणार सामने, तारखा नोट करून ठेवा

टी-२० विश्वचषक २०२६ मध्ये आतापर्यंत दक्षिण आफ्रिका, वेस्ट इंडिज व भारत हे ३ संघ सुपर-८ साठी पात्र ठरले आहेत. प्री-सीडिंगनुसार, सुपर ८ च्या ग्रुप जी १ मध्ये टीम इंडियाला एक्स १ मानलं जात आहे. आता, टीम इंडियाने एक्स १ म्हणून सुपर-८मध्ये आपलं स्थान निश्चित केलं आहे. पुढील फेरीतील भारतीय संघाच्या तीन सामन्यांच्या तारखा देखील निश्चित झाल्या आहेत व जवळपास प्रतिस्पर्धी संघ देखील निश्चित झाले आहेत.

वेस्ट इंडिजने तिन्ही सामने जिंकल्यानंतर क गटामधून पात्रता मिळवली आणि सुपर ८ साठी X3 स्थान विडिंज संघाचं आहे. यासह आता हे स्पष्ट झालं आहे की भारत आणि वेस्ट इंडिज सुपर-८ मध्ये भिडणार आहेत आणि त्याची तारीख देखील जाहीर झाली आहे. तर त्यापूर्वी भारताचा सामना दक्षिण आफ्रिका संघाविरूद्ध होणार आहे. ब गटातून श्रीलंका आणि झिम्बाब्वे हे संघ आता पात्र ठरले आहेत. श्रीलंकाने ऑस्ट्रेलियाचा पराभव करत त्यांना जवळपास स्पर्धेतून बाहेर केलं होतं. तर १७ जानेवारीला होणारा आयर्लंड आणि झिम्बाब्वे यांच्यातील सामना पावसामुळे रद्द झाल्याने झिम्बाब्वेचा संघ सुपर-८ फेरीत पोहोचला आहे. यासह ऑस्ट्रेलिया संघाला टी-२० विश्वचषक २०२६ च्या गट टप्प्यातून बाहेर पडावं लागलं आहे.

सुपर-८फेरीसाठी भारताचं वेळापत्रक

भारत वि. दक्षिण आफ्रिका – २२ फेब्रुवारी, अहमदाबाद
भारत वि. झिम्बाब्वे – २६ फेब्रुवारी, चेन्नई
भारत वि. वेस्ट इंडिज – १ मार्च, कोलकाता

भारताचे सुपर-८ मधील तिन्ही सामने भारतात होणार असून हे सामने अनुक्रमे अहमदाबाद, चेन्नई आणि कोलकातामध्ये होणार आहेत. तर टीम इंडियाचे सर्व सामने संध्याकाळी ७ वाजता खेळवले जातील.