कोहली मुकणार, रोहितबाबत संभ्रम; अफगाणिस्तान विरुद्धच्या एकदिवसीय मालिकेपूर्वी भारतासमोर पेच

‘आयपीएल’च्या रविवारी अहमदाबाद येथे झालेल्या अंतिम सामन्यात रॉयल चॅलेंजर्स बंगळूरुकडून खेळताना कोहलीला दुखापत झाली. गुजरात टायटन्सविरुद्धच्या धावांचा यशस्वी पाठलाग करताना त्याचे पायाचे स्नायू दुखावले. त्यावेळी वैद्यकीय पथकाने मैदानात येऊन त्याच्यावर प्रथमोपचार केले होते. मात्र, त्यानंतर करण्यात आलेल्या चाचणीत कोहलीची दुखापत काहीशी गंभीर असल्याचे स्पष्ट झाले. त्याला किमान दोन आठवड्यांची विश्रांती घेण्याचा सल्ला देण्यात आला आहे.

तो अफगाणिस्तान संघाविरुद्धच्या मालिकेतील अखेरच्या एकदिवसीय सामन्यासाठी तंदुरुस्त होण्याची शक्यता असली तरी, निवड समिती त्याचा विचार करणार नसल्याचे संकेत आहेत. या मालिकेनंतर भारतीय संघाचा जुलैमध्ये इंग्लंड दौरा आहे. त्या दौर्‍यात एकदिवसीय सामनेही खेळवले जाणार आहेत. त्यामुळे कोहलीच्या तंदुरुस्तीबाबत कोणताही धोका पत्करण्याची संघ व्यवस्थापनाची तयारी नाही.

अफगाणिस्तान मालिकेत रोहित शर्मा खेळणार की नाही, हेसुद्धा अद्याप निश्चित नाही. नुकत्याच झालेल्या ‘आयपीएल’मध्ये मुंबई इंडियन्सकडून खेळताना रोहितलाही पायाची दुखापत झाली होती आणि त्याला काही सामन्यांना मुकावे लागले होते. आता अफगाणिस्तानविरुद्धच्या मालिकेसाठी त्याच्या उपलब्धतेचा निर्णय तंदुरुस्ती चाचणीच्या निकालावर अवलंबून असेल.

गायकवाड, जैस्वालला संधी?

’ कोहली आणि रोहित अफगाणिस्तानविरुद्ध खेळू न शकल्यास त्यांच्या जागी अनुक्रमे ऋतुराज गायकवाड आणि यशस्वी जैस्वाल यांना संधी मिळेल असे समजते. याआधीच निवडलेल्या १५ सदस्यीय संघात इशान किशन राखीव सलामीवीर आहे.

’ कोहलीच्या अनुपस्थितीत तिसर्‍या क्रमांकासाठी भारताकडे ऋतुराजसह देवदत्त पडिक्कल, तिलक वर्मा, संजू सॅमसन आणि रजत पाटीदार यांचाही पर्याय आहे. ऋतुराजने गेल्या वर्षीच्या अखेरीस दक्षिण आफ्रिकेविरुद्धच्या एकदिवसीय सामन्यात शतक केले होते. त्यामुळे सध्या त्याचे पारडे जड मानले जात आहे.

इंग्लंड दौर्‍यासाठी उद्या संघनिवड

कर्णधारपदाचा निर्णय अपेक्षित आगामी आयर्लंड आणि इंग्लंड दौर्‍यातील ट्वेन्टी-२० मालिका आणि आशियाई क्रीडा स्पर्धांसाठी संघनिवड करण्याकरिता अजित आगरकर यांच्या अध्यक्षतेखालील निवड समितीची शनिवारी बैठक होणार आहे. त्यावेळीच ट्वेन्टी-२० संघाचा कर्णधार सूर्यकुमार यादवच्या भवितव्याबाबत निर्णय घेतला जाईल. त्याला कर्णधारपदावरून हटविल्यास श्रेयस अय्यर, तिलक वर्मा आणि इशान किशन यांच्यापैकी एकाकडे जबाबदारी सोपवली जाईल अशी चर्चा आहे.