India vs Australia 2nd ODI Match Updates: भारत आणि ऑस्ट्रेलिया यांच्यातील एकदिवसीय मालिकेतील दुसरा सामना आज इंदूरमध्ये खेळला जात आहे. हा सामना जिंकून संघ भारत मालिका जिंकू इच्छित आहे. त्याच वेळी, ऑस्ट्रेलिया मालिकेत बरोबरी साधण्याचा प्रयत्न करेल. तत्पूर्वी या सामन्यात भारतीय संघाने प्रथम फलंदाजी करताना श्रेयस अय्यर आणि शुबमन गिल यांनी दमदार फटकेबाजी केली. या दोघांनी भारतीय संघाला मोठी धावसंख्या उभारुन देताना आपापली शतकं झळकावली.
प्रथम श्रेयस अय्यरने झळकावले शतक –
भारताचा स्टार फलंदाज श्रेयस अय्यरही फॉर्ममध्ये परतला आहे. ऑस्ट्रेलियाविरुद्धच्या दुसऱ्या एकदिवसीय सामन्यात त्याने ८६ चेंडूत शतक झळकावले. हे त्याचे एकदिवसीय कारकिर्दीतील तिसरे आणि एकूण चौथे शतक होते. वनडे व्यतिरिक्त श्रेयसने कसोटीतही शतक झळकावले. तो शतकानंतर १०५ धावा काढून बाद झाला. त्याने ९० चेंडूत ११ चौकार आणि ३ षटकार लगावले.
दुसऱ्या विकेटसाठी २००धावांची भागीदारी –
मार्चमध्ये पाठीच्या दुखापतीमुळे श्रेयस क्रिकेटपासून दूर होता. यानंतर त्याने नुकतेच आशिया चषक स्पर्धेत पुनरागमन केले, मात्र दोन सामने खेळल्यानंतर त्याला पुन्हा दुखापत झाली. मात्र, आशिया चषकातील पाकिस्तानविरुद्धच्या पहिल्या सामन्यात आणि या मालिकेतील ऑस्ट्रेलियाविरुद्धच्या पहिल्या एकदिवसीय सामन्यात त्याला विशेष काही करता आले नाही. श्रेयसने शुबमनसोबत दुसऱ्या विकेटसाठी २००धावांची भागीदारी केली.
शुबमन गिलनेही झळकावले शतक –
श्रेयस अय्यरनंतर इंदूरच्या होळकर स्टेडियमवर शुबमन गिलची जादू पाहायला मिळाली. त्याने त्याच्या एकदिवसीय कारकिर्दीतील सहावे शतक आणि एकूण नववे शतक ९२ चेंडूत झळकावले. वनडेतील सहा शतकांव्यतिरिक्त त्याने कसोटीत दोन शतके आणि टी-२० मध्ये एक शतक झळकावले आहे. ३३ षटकांनंतर भारताची धावसंख्या दोन गड्यांच्या मोबदल्यात २३० धावा आहे. शुबमन ९२ चेंडूत १०० धावा तर केएल राहुल ९ धावांवर फलंदाजी करत आहे. तत्पूर्वी, श्रेयस अय्यर ९० चेंडूत १०५ धावा करून बाद झाला.
