IND vs NZ 3rd T20 Live: १० षटकात भारतीय संघाने उडवला न्यूझीलंडचा धुव्वा; मालिकेत घेतली विजयी आघाडी

चौथ्या षटकात अर्धशतकी भागीदारी पूर्ण केल्यानंतर ईशान किशन त्याच षटकात मोठा फटका खेळण्याच्या प्रयत्नात झेलबाद झाला. ईश सोधीने संघाला दुसरी विकेट मिळवून दिली. यासह ४ षटकांत टीम इंडियाने २ बाद ६० धावा केल्या आहेत.

संजू सॅमसन सलग तिसऱ्या सामन्यात अपयशी ठरला आहे. तिसऱ्या सामन्यात तर सॅमसन गोल्डन डकवर क्लीन बोल्ड झाला आहे.

२०वं षटक टाकण्यासाठी आलेल्या बुमराहने कर्णधार मिचेल सँटनरला झेलबाद करत तिसरी विकेट मिळवली आहे. यासह न्यूझीलंडने नववी विकेट गमावली.

रवी बिश्नोईने १६व्या षटकातील पहिल्या चेंडूवर फिलिप्सला झेलबाद करत संघाला अजून एक मोठी विकेट मिळवून दिली. फिलिप्स ४८ धावांवर झेलबाद झाल्याने त्याचं अर्धशतक हुकलं.

रवी बिश्नोईने १२व्या षटकातील अखेरच्या चेंडूवर मार्क चॅपमनला झेलबाद करत अर्धशतकी भागीदारी तोडली आहे. रवी बिश्नोई बऱ्याच काळानंतर संघात पुनरागमन करत उत्तम गोलंदाजी केली आहे. ३ पैकी एकाही षटकात बाऊंड्री दिलेली नाही.

जसप्रीत बुमराहने पॉवरप्लेचं अखेरचं षटक टाकण्यासाठी आला आणि पहिल्याच चेंडूवर त्याने टीम सेफर्टला क्लीन बोल्ड केलं. सेफर्टला काही कळण्याआत तो बोल्ड झाला आणि स्टंप हवेत कोलांट्या खात उडाला. यासह न्यूझीलंडने तिसरी विकेट गमावली.

हर्षित राणाने भारताकडून गोलंदाजीला सुरूवात करत पहिल्या षटकातील तिसऱ्याच चेंडूवर झेलबाद केल. हार्दिक पंड्याने कमालीची उडी मारत शानदार झेल टिपला. यासह हर्षित राणाने डेव्हॉन कॉन्वेला पाच वेळा बाद केलं आहे. तिन्ही वनडे सामने, दोन टी-२० सामन्यांमध्ये हर्षित राणासमोर कॉन्वे फार काळ टिकू शकला नाही.

संजू सॅमसन (विकेटकीपर), अभिषेक शर्मा, इशान किशन, सूर्यकुमार यादव (कर्णधार), शिवम दुबे, हार्दिक पांड्या, रिंकू सिंग, हर्षित राणा, रवी बिश्नोई, कुलदीप यादव, जसप्रीत बुमराह

अर्शदीप सिंग व वरूण चक्रवर्तीला विश्रांती देत बुमराह व रवी बिश्नोईला प्लेईंग इलेव्हनमध्ये संधी दिली आहे.

भारतीय संघाने तिसऱ्या टी-२० सामन्याची नाणेफेक जिंकत प्रथम गोलंदाजीचा निर्णय़ घेतला आहे. तर न्यूझीलंडचा संघ फलंदाजीने सामन्याला सुरूवात करेल.

भारत आणि न्यूझीलंड यांच्यातील टी-२० मालिकेतील तिसरा सामना आज खेळवला जात आहे. हा सामना गुवाहाटीमधील बारसपारा स्टेडियम होत आहे. मालिकेतील सुरूवातीचे दोन सामने जिंकल्यानंतर आता सलग तिसरा टी-२० सामना जिंकत संघ मालिका आपल्या नावे करण्याच्या उद्देशाने उतरणार आहे.