भारत-पाकिस्तान सामने वनडे विश्वचषकात तब्बल ३ वेळा होण्याची शक्यता, ICCच्या नव्या फॉरमॅटमुळे स्पर्धेचं चित्र बदलणार

आयसीसीने स्पर्धेच्या रचनेत काही गुंतागुंतीचे बदल केले आहेत, ज्यामुळे भारत आणि पाकिस्तान यांच्यात जास्तीत जास्त सामने होण्याचा मार्ग पूर्णपणे मोकळा झाला आहे. आयसीसीच्या या नवीन रचनेमागील संपूर्ण गणित समजून घेऊया. २०२३ च्या विश्वचषकातील १० संघांची संख्या २०२७ मध्ये १४ पर्यंत वाढवण्याचा निर्णय घेण्यात आला आहे, परंतु केवळ कागदावर दिसणारा हा विस्तार म्हणजे मुळात एक आभास आहे.

आंतरराष्ट्रीय क्रिकेट परिषदेने (ICC) बुधवारी २०२७ च्या वनडे विश्वचषकाच्या स्पर्धेच्या स्वरूपात मोठे बदल जाहीर केले. या नव्या फॉरमॅटनुसार कट्टर प्रतिस्पर्धी भारत आणि पाकिस्तान यांच्यात अतिरिक्त सामना होण्याची शक्यता निर्माण झाली आहे. २०२७ विश्वचषकात १४ संघ सहभागी होणार असले तरी स्पर्धेची रचना बदलण्यात आली आहे. पात्र ठरलेल्या संघांपैकी क्रमवारीत तळाच्या तीन संघांना प्रथम प्राथमिक फेरी खेळावी लागेल. या फेरीतून केवळ एकच संघ पुढील टप्प्यात प्रवेश करेल.

त्यानंतर मुख्य फेरीत १२ संघांचे प्रत्येकी सहा संघांचे दोन गट असतील. यानंतर आतापर्यंत असलेली ‘सुपर सिक्स’ फेरी रद्द करण्यात आली असून तिच्या जागी ‘सुपर ७’ फेरी खेळवली जाईल. विशेष म्हणजे, यावेळी स्पर्धेत उपांत्यपूर्व फेरी (क्वार्टरफायनल) असणार नाही. मात्र, मुख्य फेरीतील साखळी सामन्यांची संख्या वाढल्यामुळे भारत आणि पाकिस्तान यांच्यात विश्वचषकात आणखी एक सामना होण्याची शक्यता वाढली आहे.

नव्या स्पर्धेच्या फॉरमॅटमुळे भारत आणि पाकिस्तान यांच्यात एकाच विश्वचषकात तब्बल तीन सामने होण्याची शक्यता निर्माण झाली आहे. दोन्ही संघ प्रथम गट फेरीत आमनेसामने येऊ शकतात. त्यानंतर ‘सुपर ७’ फेरीत पुन्हा एकदा त्यांची भिडंत होऊ शकते. तसेच, दोन्ही संघांनी पुढील फेरी गाठल्यास उपांत्य फेरी किंवा अंतिम सामन्यातही त्यांचा सामना होऊ शकतो. भारत-पाकिस्तान सामना हा जगातील सर्वाधिक महसूल मिळवून देणारा क्रिकेट सामना मानला जातो. अशा सामन्यांमुळे आयसीसीला प्रसारण हक्क (Broadcast Rights) आणि व्यावसायिक करारांमधून मोठ्या प्रमाणात उत्पन्न मिळते.