होल्डरची झुंज अपयशी; पंजाबचा विजय जेसन होल्डरच्या (३/१९ आणि नाबाद ४७) अष्टपैलू खेळानंतरही पंजाब किंग्जविरुद्ध ‘आयपीएल’ क्रिकेटच्या शनिवारी रात्री झालेल्या सामन्यात सनरायजर्स हैदराबादला पराभव पत्करावा लागला. नऊ सामन्यांत आठव्या पराभवामुळे हैदराबादचे स्पर्धेतील आव्हान संपुष्टात आले. पंजाब किंग्जने २० षटकांत ७ बाद १२५ धावा केल्या. यात कर्णधार के. एल. राहुल (२१) व एडीन मार्करमचे (२७) महत्त्वाचे योगदान होते. त्यानंतर हैदराबादला २० षटकांत ७ बाद १२० धावाच करता आल्या. मोहम्मद शमीने डेव्हिड वॉर्नर (२) आणि कर्णधार केन विल्यम्सन (१) यांना झटपट माघारी धाडले. मधल्या षटकांत फिरकीपटू रवी बिष्णोईने २४ धावांत तीन बळी घेत हैदराबादला अडचणीत टाकले. उत्तरार्धात होल्डरला वृद्धिमान साहा (३१) वगळता इतरांची साथ लाभली नाही. संक्षिप्त धावफलक पंजाब किंग्ज : २० षटकांत ७ बाद १२५ (एडीन मार्करम २७, के. एल. राहुल २१; जेसन होल्डर ३/१९) विजयी वि. सनरायजर्स हैदराबाद : २० षटकांत ७ बाद १२० (जेसन होल्डर नाबाद ४७; रवी बिष्णोई ३/२४)
