IND vs ENG: “हॅप्पी रिटायरमेंट जड्डू…”, T20 WCच्या सेलिब्रेशनमध्ये पंत-बुमराह जडेजाला असं का म्हणाले? VIDEO व्हायरल

भारतीय संघाने बर्मिंगहममधील टीम हॉटेलमध्ये केक कापत भारताच्या वर्ल्डकप विजयाच्या वर्षपूर्तीचं सेलिब्रेशन केलं. यादरम्यान दोन केक ठेवण्यात आले होते. एका केकवर टीम इंडिया तर दुसऱ्या केकवर चॅम्पियन्स T20 WC 2024 असं लिहिलं आहे. या सेलिब्रेशनसाठी टीम इंडियाचे सर्व खेळाडूही तिथे उपस्थित होते. बीसीसीआयने या सेलिब्रेशनचा व्हीडिओ शेअर केला आहे.

केक नेमकं कोण कापणार, यावर मोठा गोंधळ उडाला होता. टीम इंडियाचे दोन्ही सिनियर खेळाडू रोहित शर्मा आणि विराट कोहली तर या दौऱ्यावर नाहीत. त्यामुळे सर्वच जण एकमेकांना पुढे पुढे करत होते. सर्वांनी आधी अर्शदीप आणि सिराजला पुढे केलं. तितक्यात जसप्रीत बुमराहकडे बोट दाखवत एक जण मॅन ऑफ द सिरिज म्हणाला आणि अर्शदीपने त्याला केक कापण्यासाठी पुढे घेतलं. एक केक बुमराहने तर दुसरा केक सिराजने कापला आणि दोघांनीही एकमेकांना भरवला.

केक कापल्यानंतर सर्वच जण एकमेकांना केक भरवत होते. मॅन ऑफ द सिरीज म्हणत पंतने बुमराहला केक भरवला. यानंतर पंतने जडेजाला पकडलं आणि म्हणाला, “जड्डू भाईला हॅपी रिटायरमेंट, एक वर्ष झालं.” तितक्यात मागून बुमराह आणि सिराजनेही हॅपी रिटायरमेंट म्हटलं. हे ऐकून जडेजा म्हणाला, “एकाच फॉरमॅटमधून रिटायरमेंट घेतली आहे.” हे ऐकून सगळेच एकदम हसू लागले.

भारताने टी-२० विश्वचषक २०२४ जिंकल्यानंतर सर्वात आधी विराट कोहलीने टी-२० फॉरमॅटमधून निवृत्ती जाहीर केली. यानंतर रोहित शर्मा आणि मग रवींद्र जडेजाने टी-२० क्रिकेटला अलविदा केलं. भारताच्या वर्ल्डकप विजयाच्या वर्षपूर्तीसह या तिन्ही खेळाडूंच्या टी-२० निवृत्तीलाही एक वर्ष पूर्ण झालं आहे.