कोलकाता आणि चेन्नई संघादरम्यान रंगलेल्या अंतिम सामन्यात चेन्नईने विजयासाठी १९३ धावांचं आव्हान दिलं होतं. कोलकात्याच्या शुभमन गिल आणि वेंकटेश अय्यर यांनी संघाला चांगली सुरुवात केली. सुरुवातीला धोनी आणि शार्दुल ठाकुर यांनी सोपे झेल सोडल्याने त्यांच्या फलंदाजीला आणखीनच धार चढली. दोघांनी पहिल्या गड्यासाठी ९१ धावांची भागीदारी केली. गडी बाद होत नसल्याने चेन्नई गोलंदाज हतबल झाले होते. अखेर धोनीने संघाचं दहावं षटक रवींद्र जडेजाच्या हाती सोपवलं. या षटकाच्या तिसऱ्या चेंडूवर शुभमन गिलनं उंच फटका मारला. हा झेल अंबाती रायडू पकडला. त्यानंतर शुभमन बाद झाल्याने तंबूच्या दिशेने जाऊ लागला. मात्र पंचांनी त्याला थांबवलं. यामुळे चेन्नईचा कर्णधार महेंद्रसिंह धोनी पंचाशी बातचीत केली. नेमका काय प्रकार झाला? असं मैदानात उपस्थित असलेले प्रेक्षक आणि टीव्ही पाहणाऱ्या क्रीडाप्रेमींना कळला नाही. अखेर तो चेंडू डेड असल्याचं घोषित करण्यात आले. शुभमन गिलने उंच ठोकलेला चेंडू स्पाइडर कॅमच्या केबलला लागला. त्यामुळे हा चेंडू डेड घोषित करण्यात आला. शुभमन गिलला नाबाद दिल्यानंतर सोशल मीडियावर मीम्सचा पाऊस पडला आहे. नेटकऱ्यांनी मजेशीर मीम्स शेअर केले आहेत. चेन्नईच्या फॅन्सने कमेंट्समध्ये तीव्र संताप व्यक्त केला आहे. शुभमन गिलला बाद झाला असता तर त्याची खेळी २७ धावांवर संपली असती. मात्र त्याला मिळालेल्या जीवदानाचा त्याने फायदा घेतला आणि अर्धशतक झळकावलं. शुभमन गिलनं ४३ चेंडूत ५१ धावांची खेळी केली. यात ६ चौकारांचा समावेश आहे.