शेवटच्या षटकापर्यंत रंगलेल्या आयपीएल २०२१च्या ३२व्या सामन्यात राजस्थान रॉयल्सने पंजाब किंग्जवर २ धावांनी निसटता विजय मिळवला. पंजाबच्या एडम मार्कराम आणि निकोलस पूरन यांना शेवटच्या षटकात ४ धावांची गरज होती, पण राजस्थानचा गोलंदाज कार्तिक त्यागीने एकच धाव देत आणि दोन विकेट्स घेत सामना आपल्या बाजूने फिरवला. नाणेफेक गमावलेल्या संजू सॅमसनच्या संघाने प्रथम फलंदाजी करत एविन लुईस, यशस्वी जयस्वाल आणि महिपाल लोमरोर यांच्या योगदानाच्या जोरावर पंजाबला १८६ धावांचे आव्हान दिले. पंजाबकडून अर्शदीप सिंगने ३२ धावांत ५ बळी घेतले. प्रत्युत्तरात पंजाबचे सलामीवीर केएल राहुल आणि मयंक अग्रवाल यांनी १२० धावांची दमदार सलामी दिली. मयंकने अर्धशतकी खेळी केली. शेवटच्या षटकात घडलेल्या नाट्यमय घडामोडीनंतर पंजाबला २० षटकात १८२ धावाच करता आल्या. त्यागीला सामनावीर पुरस्कार मिळाला.

पंजाबचा डाव

राजस्थानच्या १८६ धावांच्या आव्हानाचा पाठलाग करताना मयंक अग्रवाल आणि कर्णधार केएल राहुल यांनी पंजाबसाठी सलामी दिली. या दोघांनी पहिल्या पाच षटकात ४१ धावा जोडल्या. पॉवरप्लेपर्यंत राजस्थानच्या खेळाडूंनी राहुलचे तीन झेल सोडले. सातव्या षटकात पंजाबने अर्धशतक पूर्ण केले. त्यानंतर मयंकने आक्रमक पवित्रा धारण करत राजस्थानच्या गोलंदाजांचा खरपूस समाचार घेतला. १०व्या षटकात मयंकने मॉरिसला षटकार खेचत ३४ चेंडूत आपले अर्धशतक पूर्ण केले. याच षटकात पंजाबचे शतक फलकावर लागले. १२व्या षटकात चेतन साकारियाने पंजाबचा कर्णधार केएल राहुलला ४९ धावांवर माघारी धाडले. राहुलने आपल्या खेळीत ४ चौकार आणि २ षटकार ठोकले. मयंक-राहुल यांनी पहिल्या गड्यासाठी १२० धावा जोडल्या. राहुलनंतर मयंकही तंबूत परतला. राहुल तेवतियाने मयंकला लिव्हिंगस्टोनकरवी झेलबाद केले. मयंकने ७ चौकार आणि २ षटकारांसह ६७ धावा केल्या. या दोघानंतर निकोलस पूरन आणि एडन मार्कराम यांनी संघाचा ताबा घेतला. या दोघांनी अर्धशतकी भागीदारी रचली.

शेवटच्या षटकात फिरला सामना

शेवटच्या षटकात पंजाबला विजयासाठी ४ धावांची गरज असताना कार्तिक त्यागीच्या गोलंदाजीवर पूरन वैयक्तिक ३२ धावांवर बाद झाला. त्यानंतर त्यागीने एक चेंडू निर्धाव टाकला. पुढच्या चेंडूवर त्याने दीपक हुडाला यष्टीपाठी झेलबाद केले. एका चेंडूत तीन धावांची गरज असताना त्यागीने फॅबियन एलनला धाव घेऊ दिली नाही आणि राजस्थानने आपला विजय साजरा केला. दुसऱ्या बाजूला असलेला मार्कराम २६ धावांवर नाबाद राहिला.

राजस्थानचा डाव

एविन लुईस आणि यशस्वी जयस्वाल या सलामीवीरांनी राजस्थानच्या डावाची सुरुवात केली. पंजाबचा स्टार गोलंदाज मोहम्मद शमीच्या पहिल्या षटकात त्यांनी ९ धावा घेतल्या. इशान पोरेलने टाकलेल्या चौथ्या षटकात लुईसने ४ चौकार वसूल करत १७ धावा ठोकल्या. पाचव्या षटकात दोघांनी राजस्थानचे अर्धशतक फलकावर लावले. पंजाबचा वेगवान गोलंदाज अर्शदीपने आक्रमक खेळणाऱ्या लुईसला मयंक अग्रवालकरवी झेलबाद करत राजस्थानला पहिला धक्का दिला. त्यानंतर कर्णधार संजू सॅमसन फलंदाजीसाठी मैदानात आला, मात्र त्याला इशानने वैयक्तिक ४ धावांवर यष्टीपाठी झेलबाद केले. १० षटकात लियाम लिव्हिंगस्टोन आणि जयस्वाल यांनी राजस्थानचा धावफलक २ बाद ९४ धावा असा केला. लिव्हिंगस्टोन -जयस्वाल यांनी संघासाठी ४८ धावा जोडल्या. १२व्या षटकात लिव्हिंगस्टोन तर १५व्या षटकात जयस्वाल बाद झाला. फक्त एका धावेने जयस्वालचे अर्धशतक हुकले. त्याने आपल्या खेळीत ६ चौकार आणि २ षटकार ठोकले. त्यानंतर डावखुऱ्या महिपाल लोमरोरने १७ चेंडूत ४ षटकार आणि २ चौकारांसह ४३ धावा करत संघाला चांगली धावसंख्या गाठून देण्यात मदत केली. अर्शदीपने लोमरोरला बाद केले. त्यानंतर अर्शदीपने चेतन साकारिया आणि कार्तिक त्यागीला बाद करत आपले पाच बळी पूर्ण केले. राजस्थानचा डाव १८५ धावांवर संपुष्टात आला.

हेही वाचा – पाकिस्तानच्या बाजूनं उभा राहिला भारताचा वसीम जाफर; जाणून घ्या संपूर्ण प्रकरण

दोन्ही संघांची प्लेईंग इलेव्हन

पंजाब किंग्ज – केएल राहुल (कप्तान आणि यष्टीरक्षक), मयंक अग्रवाल, एडन मार्कराम, निकोलस पूरन, दीपक हुडा, हरप्रीत ब्रार, आदिल रशीद, इशान पोरेल, फॅबियन एलन, अर्शदीप सिंग आणि मोहम्मद शमी.

राजस्थान रॉयल्स – एविन लुईस, यशस्वी जयस्वाल, संजू सॅमसन (कप्तान आणि यष्टीरक्षक), रियान पराग, महिपाल लोमरोर, लियाम लिव्हिंगस्टोन, राहुल तेवतिया, ख्रिस मॉरिस, चेतन साकारिया, कार्तिक त्यागी आणि मुस्तफिजूर रेहमान.