BCCI Policy: IPL मध्ये आता ‘नो गर्लफ्रेंड पॉलिसी’? BCCI अ‍ॅक्शन मोडमध्ये; खेळाडूंना मोठा धक्का!

बीसीसीआय नो गर्लफ्रेंड पॉलिसी लागू करणार असल्याची चर्चा रंगली आहे. आयपीएल २०२६ स्पर्धेदरम्यान अनेक असे भारतीय खेळाडू आहेत जे आपल्या गर्लफ्रेंडसोबत फिरताना दिसून आले आहेत. काही खेळाडू विमानतळावर आपल्या गर्लफ्रेंडसोबत दिसून आले आहेत. ज्यात हार्दिक पंड्या, इशान किशन आणि अर्शदीप सिंग ही नावं आघाडीवर आहेत. बीसीसीआयचे सचिव देवजीत सैकिया यांनी स्पष्ट केलं आहे की, एकदा नियमावली जाहीर केल्यानंतर, जर कुठल्याही खेळाडूने नियम मोडले, तर त्यांच्या कडक कायदेशीर कारवाई केली जाईल. तो खेळाडू असो किंवा संघातील कुठला अधिकारी, जर चूक करताना आढळला, तर त्याला कारवाईला सामोरं जावं लागेल.

आयपीएल २०२६ स्पर्धेदरम्यान काही प्रकरणं तुफान चर्चेत राहिली आहेत. राजस्थान रॉयल्स संघाचे संघव्यवस्थापक रोमी भिंडर डगआऊटमध्ये बसून मोबाईल वापरताना दिसून आले होते. हा व्हिडीओ सोशल मीडियावर तुफान व्हायरल झाला होता. त्यानंतर त्यांच्यावर कारवाईची मागणी केली होती. बीसीसीआयने त्यांच्यावर दंड आकारला होता. त्यानंतर रियान पराग ई-सिगारेट ओढताना दिसून आला होता. हे प्रकरण देखील चांगलच गाजलं होतं. बीसीसीआयने रियान परागच्या मॅच फी वर २५ टक्के दंड आकारला होता.

बीसीसीआयचे सचिव देवजीत सैकिया यांनी एएनआयसोबत बोलताना सांगितले की, “काही संघांचे मालक आणि अधिकारी खेळाडूंसोबत अशा ठिकाणी मुक्तसंचार करत आहेत, जिथे त्यांना प्रवेश करण्याची अजिबात परवानगी नाही. आम्ही या प्रकरणांकडे अतिशय गांभीर्याने पाहत आहोत. राजस्थान रॉयल्सच्या मॅनेजरने मोबाईल वापरल्याची, एका खेळाडूने वेपिंग केल्याची घटना आधीच घडली आहे. काही अनधिकृत लोक टीम बसमधून खेळाडूंसोबत प्रवास करत आहेत. काही लोकं टीम हॉटेलमध्ये राहत आहेत. हे लोक परवानगीशिवाय खेळाडू आणि अधिकाऱ्यांच्या खोलीत जात आहेत. या सर्व गोष्टी बीसीसीआयच्या अँटी-करप्शन प्रोटोकॉलच्या विरोधात आहे.” असं देवजीत सैकिया म्हणाले.