रॉयल चॅलेंजर्स बंगळूरुचे कर्णधारपद सोडल्यानंतर आता दडपणमुक्त विराट कोहलीच्या फलंदाजीकडे रविवारी इंडियन प्रीमियर लीग (आयपीएल) क्रिकेटमध्ये सर्वाचे लक्ष असेल. बंगळूरुचा पहिला सामना पंजाब किंग्जशी होणार असून, या सामन्यात अनुक्रमे फॅफ डय़ू प्लेसिस आणि मयांक अगरवाल यांच्या नवनेतृत्वाचा कस लागेल. रॉयल चॅलेंजर्स बंगळूरु हसरंगाच्या कामगिरीकडे लक्ष कोहलीने एक दशक बंगळूरुचे नेतृत्व सांभाळले. २०१६ मध्ये बंगळूरुने उपविजेतेपदापर्यंत मजल मारली. हीच बंगळूरुची ‘आयपीएल’मधील सर्वोत्तम कामगिरी ठरली. त्या हंगामात विराटने ९००हून अधिक धावा काढताना चार अर्धशतके नोंदवली होती. याच कामगिरीची पुनरावृत्ती करण्यासाठी कोहली उत्सुक आहे. ग्लेन मॅक्सवेल आणि जोश हेझलवूड यांची उणीव बंगळूरुला भासेल. मात्र अष्टपैलू वानिंदू हसरंगाच्या कामगिरीविषयी उत्सुकता असेल. पंजाब किंग्ज बेअरस्टो, रबाडा नसल्याने चिंता इंग्लंडचा जॉनी बेअरस्टो आणि आफ्रिकेच्या कॅगिसा रबाडा नसल्यामुळे पंजाबचा संघ अडचणीत सापडला आहे. हे दोघेही आपापल्या मालिका संपवून ‘आयपीएल’मध्ये सामील होतील. महालिलावात नऊ कोटी रुपये बोली लागलेल्या स्फोटक फलंदाज शाहरूख खानकडून मोठय़ा अपेक्षा आहेत. मयांक, शिखर धवन यांच्यावर पंजाबची प्रमुख भिस्त असेल. मात्र अन्य नवख्या खेळाडूंसह पंजाब बंगळूरुशी कसा सामना करतो, हे औत्सुक्याचे ठरेल. ’ वेळ : सायं. ७.३० वा. ’ थेट प्रक्षेपण : स्टार स्पोर्ट्स, २, १ हिंदी, सिलेक्ट १