नवी दिल्ली : इंडियन प्रीमियर लीगच्या (आयपीएल) १५व्या अध्यायाला शनिवारपासून मुंबईत प्रारंभ होत असून, स्टेडिमयमध्ये २५ टक्के प्रेक्षकांना परवानगी देण्यात आली आहे, असे संयोजकांनी बुधवारी स्पष्ट केले आहे. वानखेडे स्टेडियमवर २६ मार्चला गतविजेते चेन्नई सुपर किंग्ज आणि कोलकाता नाइट रायडर्स यांच्यात पहिला सामना रंगणार आहे. करोनाच्या साथीतून सावरल्यानंतर प्रथमच ‘आयपीएल’साठी प्रेक्षकांना प्रवेश दिला जाणार आहे. ‘‘मुंबईत वानखेडे आणि ब्रेबॉर्न स्टेडियम, नवी मुंबईतील डॉ. डी. वाय. पाटील स्टेडियम तसेच पुण्याच्या गहुंजेतील महाराष्ट्र क्रिकेट संघटनेच्या स्टेडियमवर हे सामने होणार असून, करोनाच्या शिष्टाचारांचे पालन करीत २५ टक्के प्रेक्षकांना ते पाहता येतील,’’ असे संयोजकांनी म्हटले आहे. लखनऊ सुपर जायंट्स आणि गुजरात जायंट्स या दोन नव्या संघांच्या समावेशामुळे यंदाच्या ‘आयपीएल’मध्ये ७४ सामने होतील. यापैकी ७० साखळी सामने मुंबईत होणार आहेत. साखळी सामन्यांच्या तिकीट विक्रीला बुधवारपासून प्रारंभ झाला असून, www.iplt20.com आणि www.BookMyShow.com या संकेतस्थळांवर विक्रीसाठी उपलब्ध आहेत. कमिंन्स, फिंच पहिल्या पाच सामन्यांना मुकणार मुंबई : ‘आयपीएल’मधील कोलकाता नाइट रायडर्सच्या पहिल्या पाच सामन्यांना ऑस्ट्रेलियाचे पॅट कमिंन्स आणि आरोन फिंच मुकणार आहेत, अशी माहिती संघाचे प्रेरक डेव्हिड हसी यांनी बुधवारी दिली. त्यामुळे कोलकाता संघाला धक्का बसला आहे. कोलकाताची सलामीची लढत २६ मार्चला चेन्नई सुपर किंग्जशी आहे. ऑस्ट्रेलियाचा पाकिस्तान दौरा ५ एप्रिलला संपणार आहे. कोलकाताचा पाचवा सामना १० एप्रिलला होणार आहे. जैव-सुरक्षा परिघाच्या आव्हानामुळे अॅलेक्स हेल्सने आधीच माघार घेतली आहे. मोईन अद्यापही व्हिसाच्या प्रतीक्षेत नवी दिल्ली : इंग्लंडचा अष्टपैलू क्रिकेटपटू मोईन अली चेन्नई सुपर किंग्जच्या शनिवारी होणाऱ्या सलामीच्या लढतीला मुकणार आहे. भारतात जाण्याचा व्हिसा अद्याप मिळाला नसल्यामुळे तो कोलकाताविरुद्धच्या सामन्यात खेळू शकणार नाही, असे चेन्नई सुपर किंग्जचे मुख्य कार्यकारी अधिकारी काशी विश्वनाथन यांनी सांगितले. ‘‘वेगवान गोलंदाज दीपक चहरसुद्धा काही सामन्यांत खेळू शकणार नाही. विंडीजविरुद्धच्या तिसऱ्या ट्वेन्टी-२० सामन्यात त्याला दुखापत झाली होती. तो सध्या राष्ट्रीय क्रिकेट अकादमीत आहे,’’ असे विश्वनाथ यांनी सांगितले.