Yuzvendra Chahal Hattrick in IPL 2025: पंजाब किंग्जचा फिरकीपटू आणि आयपीएल इतिहासातील सर्वाधिक विकेट घेणारा गोलंदाज युजवेंद्र चहलने इतिहास घडवला आहे. चहलने आयपीएल २०२५ च्या ४९ व्या सामन्यात चेन्नई सुपर किंग्ज विरुद्ध भेदक गोलंदाजी करत हॅटट्रिक घेतली. यासह, चहल आयपीएल २०२५ मध्ये हॅटट्रिक घेणारा पहिला गोलंदाजही ठरला. याशिवाय २०२३ पासून आयपीएलमध्ये हॅटट्रिक घेणारा तो पहिला गोलंदाज आहे.
आज म्हणजेच ३० एप्रिलला चेपॉक स्टेडियमवर खेळवल्या जात असलेल्या या सामन्यात, चहलने प्रथम गोलंदाजी करणाऱ्या पंजाब किंग्जसाठी १९ व्या षटकात हा अद्भुत पराक्रम केला. या षटकात भारतीय लेग-स्पिनरने ४ विकेट्स घेतल्या, ज्यामध्ये एमएस धोनीचा एक आणि हॅट्रिकचा समावेश होता.
या हंगामात चहलच्या कामगिरीत चढ-उतार पाहायला मिळाले आहेत. या सामन्यातही अशीच स्थिती होती, जेव्हा चहलने पहिल्या २ षटकात २३ धावा दिल्या. त्यानंतर डावखुरा फलंदाज सॅम करनची स्फोटक फलंदाजी पाहून कर्णधार श्रेयस अय्यरने त्याला गोलंदाजीसाठी बोलावले नाही. पण जसं १८व्या षटकात सॅम करन झेलबाद झाल्यानंतर धोनी फलंदाजीला आला तेव्हा श्रेयसने त्याला गोलंदाजीला बोलावलं.
युझवेंद्र चहलची IPL 2025 मधील पहिली हॅटट्रिक
चहलने १९ व्या षटकाची सुरूवात वाईड बॉलने केली. मग धोनीने पहिल्या लीगल चेंडूवर षटकार मारला. पण इथून चहलने सामन्याचा रोख बदलला आणि स्वत:च्या नावे विक्रमही केला आहे. चहलने यानंतर दुसऱ्या चेंडूवर धोनीला आपल्या फिरकीच्या जाळ्यात अडकवत झेलबाद केलं. त्यानंतर दीपक हुडाने तिसऱ्या चेंडूवर दोन धावा घेतल्या.
चहलने यानंतर सलग तीन चेंडूवर हॅटट्रिक घेतली. चौथ्या चेंडूवर मोठा फटका खेळण्याच्या प्रयत्नात दीपक हुडा प्रियांश आर्यकरवी झेलबाद झाला. पाचव्या चेंडूवर चहलने अंशुल कंबोजला क्लीन बोल्ड केलं. तर अखेरच्या चेंडूवर नूर अहमद मोठा फटका खेळायला गेला आणि यान्सनने त्याला झेलबाद केलं. हॅटट्रिक घेताच चहलने त्याची आयकॉनिक पोज देत मैदानात बसला आणि अशारितीने चेन्नईचा डाव १९० धावांवर आटोपण्यात मोठी भूमिका बजावली.
चहल आयपीएल २०२५ मध्ये हॅटट्रिक घेणारा पहिला गोलंदाज ठरला. चहलने हॅटट्रिक घेण्याची ही पहिलीच वेळ नाही. यापूर्वी चहलने २०२३ मध्ये ही कामगिरी केली होती. त्यावेळी राजस्थान रॉयल्सचा भाग असलेल्या चहलने कोलकाता नाईट रायडर्सविरुद्ध हॅटट्रिक घेतली होती. यासह, तो आयपीएलमध्ये एकापेक्षा जास्त हॅटट्रिक घेणाऱ्या मोजक्या गोलंदाजांमध्ये सामील झाला. यामध्ये अमित मिश्रा, युवराज सिंग आणि रोहित शर्मा सारखी नावे आहेत.
