IND vs NAM: इशान किशनने इतिहास घडवला! टी-२० वर्ल्डकप इतिहासात अशी कामगिरी करणारा भारताचा पहिलाच फलंदाज

नामिबियाविरूद्ध सामन्यात भारताच्या प्लेईंग इलेव्हनमध्ये दोन मोठे बदल केले आहेत. अभिषेक शर्मा ७ फेब्रुवारीपासूनच आजारी आहे. त्याला वायरल ताप होता आणि त्यानंतर आता त्याच्या पोटात ठिक नसल्यामुळे तो सामन्याबाहेर झाला आहे. अभिषेक कदाचित एक-दोन सामन्यांना मुकणार असल्याचं कर्णधार सूर्यकुमारने नाणेफेकीदरम्यान सांगितलं. त्याच्या जागी संजू सॅमसन टी-२० विश्वचषक सामना खेळण्याची संधी मिळाली.

संजू सॅमसन व इशान किशनच्या जोडीने संघाला वादळी सुुूरूवात करून दिली. सॅमसनने पहिल्याच षटकात षटकार लगावत सामन्याला सुरूवात केली. यानंतर सॅमसन ८ चेंडूत ३ षटकार व एक चौकार लगावत २२ धावा करत सोपा झेल देत झेलबाद झाला. यानंतर इशान किशनने वादळी फटकेबाजी केली.

इशान किशनची वादळी फलंदाजी अन् झळकावलं ऐतिहासिक अर्धशतक

इशान किशनने स्मिटच्या षटकात सलग ४ षटकार लगावले व अखेरच्या चेंडूवर एक चौकार लगावत तब्बल २८ धावा कुटल्या. यासह पॉवरप्लेमध्ये भारताने १ बाद ८६ धावा केल्या. इशानने अवघ्या २० चेंडूत आपलं अर्धशतक झळकावलं. यासह टी-२० वर्ल्डकप इतिहासात अर्धशतक झळकावणारा इशान किशन हा भारताचा पहिलाच यष्टीरक्षक फलंदाज ठरला. याआधी कोणताही यष्टीरक्षक फलंदाज अशी कामगिरी करू शकलेला नाही.

इशान किशनने टी-२० क्रिकेटमध्ये पॉवरप्लेमध्ये आतापर्यंत दोन वेळा अर्धशतक झळकावली आहेत. या यादीत पहिल्या क्रमांकावर अभिषेक शर्मा आहे, ज्याने ३ वेळा टी-२० पॉवरप्लेमध्ये सर्वाधिक वेळेस अर्धशतक केलं आहे. याशिवाय टी-२० वर्ल्डकप इतिहासात पॉवरप्लेमध्ये अर्धशतक करणारा इशान किशन भारताचा एकूण तिसरा फलंदाज ठरला आहे. इशान किशन नामिबियाविरूद्ध सामन्यात २४ चेंडूत ६ चौकार व ५ षटकारांसह ६१ धावा करत झेलबाद झाला. त्याच्या या फटकेबाजीसह टीम इंडियाने १० षटकांतच १०० धावांचा पल्ला पार केला.

भारतासाठी टी२० मध्ये १-६ षटकांत ५० धावा पूर्ण करणारे फलंदाज

अभिषेक शर्मा (तीन वेळा)
रोहित शर्मा (दोनदा)
इशान किशन (दोनदा)
केएल राहुल (एकदा)
यशस्वी जयस्वाल (एकदा)