पाकिस्तानविरुद्ध तिसऱ्या कसोटी सामन्याच्या अखेरच्या दिवशी इंग्लंडचा अनुभवी जलदगती गोलंदाज जेम्स अँडरसनने विक्रमाला गवसणी घातली. पाकिस्तानचा कर्णधार अझर अलीला माघारी धाडत अँडरसनने कसोटी क्रिकेटमध्ये ६०० बळींचा टप्पा गाठला. अशी कामगिरी करणारा अँडरसन हा जगातील चौथा तर जलदगती गोलंदाजांपैकी पहिलाच खेळाडू ठरला. याआधी मुथय्या मुरलीथरन, शेन वॉर्न आणि अनिल कुंबळे यांनी ६०० बळींचा टप्पा गाठला होता. अँडरसनच्या या विक्रमाबद्दल क्रिकेटविश्वातून त्याच्यावर शुभेच्छांचा वर्षाव झाला.

कसोटीच्या अखेरच्या दिवसातली पहिली दोन सत्र पावसाच्या व्यत्ययामुळे वाया गेली. त्यामुळे अँडरसनला आपला विक्रम करण्यासाठी आणखी वाट पहावी लागणार की काय असं चित्र तयार झालं होतं. परंतु अखेरच्या सत्रात पावसाने उसंत घेतल्यानंतर खेळ सुरू झाला. अँडरसनने एका उसळत्या चेंडूवर पाकिस्तानचा कर्णधार अझर अलीला झेलबाद केले. चेंडू नीट न समजल्याने अझर अलीने फटका खेळलाच नाही. पण चेंडू मात्र त्याच्या बॅटला लागला आणि जो रूटने स्लिपमध्ये त्याचा झेल टिपला. त्यानंतर क्रिकेटविश्वातून अँडरसनच्या दमदार कामगिरीला सलाम करण्यात आला.

—

—

—

—

—

—

अँडरसनने ६०० बळींचा टप्पा ३३ हजार ७१७ चेंडूंमध्ये गाठला. तर मुथय्या मुरलीथरनने ३३ हजार ७११ चेंडूत ६०० बळी टिपले होते. अँडरसनने ६ चेंडू कमी टाकत ही किमया साधली असती, तर तो सर्वात जलद ६०० बळी टिपणारा गोलंदाज ठरला असता. या यादीत शेन वॉर्न (३४,९२०) तिसरा तर अनिल कुंबळे (३८,४९४) चौथा आहे.