न्यूझीलंडच्या फिरकीपटूची अनोखी कारकीर्द; गोल्फ कोर्समध्ये ग्रीन्सकीपर, रिसर्च कंपनीत फिल्ड टेक्निशियन, लॅबमध्येही केलं काम

न्यूझीलंडच्या फिरकीपटूची क्रिकेटआधाची कारकीर्द चर्चेत आहे.

जयडेन लेनॉ्क्स

न्यूझीलंडने भारताविरुद्धच्या मालिकेत राजकोट वनडेत ३१वर्षीय जयडेन लेनॉक्सला पदार्पणाची संधी दिली. नियमित कर्णधार मिचेल सँटनरप्रमाणेच अॅक्शन असणाऱ्या लेनॉक्सने पदार्पणाच्या लढतीत कामगिरीने चाहत्यांना प्रभावित केलं. क्रिकेटच्या मैदानापेक्षा लेनॉक्सच्या लिंक्डिन प्रोफाईलची सोशल मीडियावर चर्चा आहे.

१४ जानेवारी रोजी राजकोट इथे झालेल्या दुसऱ्या वनडेत न्यूझीलंडने आदित्य अशोकऐवजी लेनॉक्सला संधी दिली. १०व्या षटकात लेनॉक्स गोलंदाजीला आला. पहिल्या षटकात त्याने अवघ्या दोन धावा दिल्या. १० षटकात एक विकेट घेत त्याने कोटा पूर्ण केला.

क्रिकेटच्या मैदानावर लेनॉक्सची फिरकी जादू दाखवण्यापूर्वी अनेकविध क्षेत्रात त्याचा मुक्त संचार असल्याचं स्पष्ट आहे. नोकरी, रोजगार यासंदर्भात लिंक्डिन वेबसाईटवर लेनॉक्सच्या आधीच्या कामाबद्दल माहिती दिली आहे.

सायन्स अँड टेक्नॉलॉजी, एन्व्हायरमेंटल सायन्स आणि भूगोलाचं लेनॉक्सने शिक्षण घेतलं आहे. क्रिकेटची आवड जोपासताना त्याने पूर्णवेळ तसंच हंगामी स्वरुपाच्या नोकऱ्या केल्या आहेत.

ऑस्ट्रेलियातल्या पाल्मरस्टोन गोल्फ कोर्सवर ग्रीन्सकीपर म्हणून तो काम करायचा. अॅक्वालिंक रिसर्च लिमिटेड कंपनीत फिल्ड टेक्निशियन म्हणून त्याने काम पाहिलं. हसलर इक्विपमेंट मध्ये तो असेंल्बी टेक्निशियन होता. एआरएल कंपनीत अर्धवेळ लॅब टेक्निशियन म्हणून काम करत होता.

डोमेस्टिक क्रिकेटमध्ये लेनॉक्स सेंट्रल डिस्ट्रिक्ट संघाकडून खेळतो. २१ फर्स्टक्लास, ५४ लिस्ट ए आणि ४५ टी२० सामन्यात त्याने डिस्ट्रिक्टचं प्रतिनिधित्व केलं आहे. २०२१ मध्ये सुपर स्मॅश स्पर्धेत त्याने पदार्पण केलं. वेस्ट इंडिजमध्ये झालेल्या ग्लोबल सुपर लीग स्पर्धेत तो संघाचा भाग होता. बांगलादेश दौऱ्यावर गेलेल्या न्यूझीलंड अ संघाचाही तो भाग होता. दक्षिण आफ्रिका अ संघाविरुद्धही तो खेळला होता.